Hemserekê Buroyê Edaletî yê Îdareyê Xoserî yê Herêma Cizîre Zeynebe Mihemmed û Yilmaz Şêro netîceya hêrişê bi droneyê çekdarî yê dewleta tirke ya îşxalkere de şehîd bîyî. Îdareyê Cizîre hêrişê terorî yê dewleta tirke şermezar kerd.

Eşkerayîye qezaya Amûde ya Qamişlo de ameye dayene û hetê Hemserekê Meclîsê Rayberdişî Ahîn Siwêdî ra ameye wendene.  Eşkerayîye de nê ameyî vatene: ‘’Dewleta tirke ya îşxalkere vizêr pê dronanê çekdaran wesayîtêkê dezgehanê Îdareyê Xoserî hedef girewt û Hemserekê Buroyê Edaletî yê Îdareyê Xoserî yê Herêma Cizîre Zeynebe Mihemmed û Yilmaz Şêro qetil kerdî. Reyna saetanê şanî de dewê Zîrganî ameyî bombardumankerdene û di domanê ameyî qetilkerdene. Nê hêrişê wehşîyî dewamê şerê qirkerdişî yê vera şaranê herême yo. Kesê ke şarê xo rê xizmet kenê yenê hedefkerdene û şaro sîvîl yeno tersnayene ke herême ra vejîyo. Pê nê hêrişan hetêkî ra zî paştî dîyeno çeteyanê DAÎŞî. Ma hêrişê terorî yê dewleta tirke şermezar kenê vera merdimîye sey sûcê şerî vînenî. Wa komelê mîyanneteweyîyî, Koalîsyon û Rûsya hinda nê hêrişanê wehşîyen bivîno û vera ci bêveng memamo. Ma keyeyanê embazanê xo yê şehîdan û  şarê Rojawanî rê serweşîye wazenê û soz danê ke ma do destkewteyanê herême bipawê.’’