Îdareyê Xoserî yê Rojawanê Kurdîstanî derheqê hêrişanê îşxalî yê dewleta tirke ya îşxalkere eşkerayîyêke daye.

Eşkerayîye de ame vîrvistene ke dewleta tirke ya îşxalkere vizêrî ra nata ancî merkezanê xizmetî û binawanîya herême kena hedef û sûcanê şerî kena.

Îdareyê Xoserî vat: ''Hukmatê tirkan şewe erey herêmê Tirbespiyê, Rimêlan, Derik û Çilaxa dayî bombayan ver. Armancê nê hêrişan herimnayîşê aramîya herême, astengkerdişê têkoşînê ma yê vera terorî û astengkerdişê şertanê çareserîye yo.

Dewleta tirke wazena şarê herême bida koçkerdene. Ganî verê nê kayê gemarinî bigêrayo, hêrişê vera erdê ma biqedê. Nê hêrişê dewleta tirke seba pêro herême gef ê û xizmetê terorî kenê. Dewleta tirke armanc kena ke bi hêrişanê vera herêma ma serê binkewtişanê xo bigêra.

Ma venga pêro hêzanê Sûrîye danê ke vera nê hêrişan hişyar bê. Ganî dezgehê heqan, huqûqî û merdimatîye verê nê hêrişan bigêrê. Ma venga şarê xo danê ke wayîrê dezgehanê xo, şorişî vejîyo û xopawitişî bikero.''