Îdlîbo ke mabênê Moskowa û vervatoxê çeteyan Enqere de "herêma bêpêkewtişî " ameyo bewlîkerdene de mabênê hêzanê rejîmî û Heyet Tehrîr El Şamî (HTŞ) de bombardûmanî dewam kenê. Sîvîlî ver bi sînorî remenê.
2'ê Gulane ra nata rejîmê Sûrîye û îttîfaqa ci Rûsya bombardûmanêko giran Îdlîb de kenê.
Şewa 2'ê Gulane de Heyet Tehrîr Şamî bi fuzeyanê grad û droneyan hêrişê qerargehê hewayî yê Rûsya yê Hymemîmî kerd û dima hêrişî hêzanê rejîmî û Rûsya bombardûmanê xo zêdnayî. Roja Yewşemeyî hêzanê rejîmî rojawanê Îdlîbî de hêrişê hewayî yê giranî kerdî. Xeta rojawanê Îdlîbî û Hamayî ra bi hezaran Îdlîbijî remayî dewanê Atme û Aqrabatî yê Îdlîbî. Goreyê zanayîşan ê ke ANF’yî çemeyanê biasayîşan ra girewtê, dewleta Tirkî 18 rojî yo serê sînorê Hatay-Îdlîbî de seba 400 hezar kesî kampa bexwaştoxan awan kena.
