Dewleta tirkî bi paştîdayîşê îstîxbaratê Sûrîye 12ê Kanûne ya 1980 de dewa Cirnikê ya Qamişlo ya Rojawanî de hêrişê keyeyêk kerd û îdarekaranê rêxistina KAWA û şarê  keyeyî ra 16 tenî qetil kerdî. Hêrişo ke Îdarekaranê KAWA ra Huseyîn Arslan, Mehmet Emîn Mutlu, Necla Baksî, (gama ke ameye qetilkerdene di gane bî) Mehmet Dursun, Muslum Yildiz û Hasan Ateş û wayîrê keyeyî Remezan Kebreş, Azad Remezan, Hanîfe Remezane, Şukru Remezan, Xweşnaw Remezan, Emîne Remezane, Abdulkerîm Remezan, Ferhat Kerîm û Kawa Kerîm ameyî qetilkerdene, şahidanê ci ANFyî rê qisey kerd.

DEWLETA TIRKÎ SEY VIZÊR EWRO ZÎ KURDAN QETIL KENA

Heybet Açikgozo ke hêrişî ra rixmê 14 guleyan weş xelisyayo ard ziwan ke ê keye de bêsîleh bî, dewleta tirkî înan ser guleyî varnayî. Açikgozî vat ke o birîndar bajaranê cîya cîyayan de bi kelepçeyan ame dermankerdene û bado zî ame tewqîfkerdene û wina dewam  kerd: ‘‘Dewleta tirkî 40 serrî cuwa ver çîyo ke bi kurdan kerdêne  ewro zî heman çîyî kena. Dewleta tirkî bi behaneyanê cîya cîyayan sey vizêrî ewro zî herişê kurdan kena. O wext hêzêkê pîlî yê kurdan çînê bi. La ewro ganî kurdî xoverdayîş xurt bikerî, paştî bidî Rojawan û cehdê şehîdan bîyarî ca.‘‘

SEBA QIRKERDIŞÊ KURDAN BEHANEYÊKÊ DEWLATA TIRKÎ TIM ESTO

Cîranê Remezan Kebreşî û şahidê qirkerdişî ra Mihemed Hecî Seyîdî zî nê vatî: ‘‘Heta ma resayî ci banê Remezanî vêşabi û pêro merdîbî. Tena yew birîndar mendibi. Qetilkaran domenêkê Remezan Kebreşî zî wexto ke dibistan ra şiyêne keye, raye de qetil kerd. Dişmenê ma çi ray veng nêvindenî. Her wext seba qirkerdişê kurdan behaneyêk înan esto.‘‘

Şahidanê qirkerdişî ra Zenep Şero zî da zanayene ke hêrişkaran bi bomba û tifingan eşt banê Remezanî ser û wina dewam kerd: ‘‘Tayî semedê hetkarîye vazdayî la hêrişkaran guleyî varnayî nînan ser o zî. Dewleta tirkî tim dişmenê ma bî, dişmenîya ci ewro zî dewam kena.‘‘

QIRKERDIŞÊKO WEHŞÎ BI

Sekreterê Pêroyî yê Partîya Çepî ya Demokrate ya Kurdistanî a Sûrîye Salîh Gedo ke qirkerdişî ra dima cade şibi cayê qewimîyayîşî, ê zî vat ke qirkerdişêko wehşî bi. Wijdanan de derbê girdî akerdî. Dewleta tirkî sînor ra ravêrtî û cayo ke cendirmeyê Sûrîye estî de qirkerdişêk viraşt, no zaf manîdar o.‘‘