Netîceya hêrişanê dewleta tirke yê vera Rojawanî de 9ê teşrîna verêne ya 2019î ra nata 30 dewê Til Temirî ameyî vengkerdene û îşxalkerdene. 27 dewê Til Temirî zî vurîyayî cepheyê şerî.

Hemserekê Meclîsê Til Temirî Ciwan Mele Eyûbî derheqê hêrişanê vera Til Temirî, şerê taybetî, tesîrê hêrişan û xoverdayîşê şarî de ANFyî rê qisey kerd.

Eyûbî vist vîrî ke heta nika dewleta tirke 30 dewê Til Temirî veng û îşxal kerdî û vat: ''9ê teşrîna verêne ya 2019î ra nata cergê dewleta tirke her roje hêr,iê sivîlan kenê, keye û axpînanê dewijan vêşnenê. Hewteyêk o hêrişê vera dewanê Til Temir û Zirganî zêdîyayî. Bi taybetî hêrişê vera Dildare zêdîyayî. Xeylêk sivîlî merdî û birîndar bîyî.

Nê hêrişan reyde dewleta tirke şerê taybetî zî kena; awe û ceyranê ma birîyenê, awa Îstasyonê Elokî tewr tay 30 reyî birîyaye. Kantonê Hesekê dewleta tirke 1.5 mîlyon merdimî bêawe verdayî.  Hêzê rejîmê Sûrîye û Rûsya herême de ca bîyî la wezîfeyê xo nêanê ca. Pê garantorîya Rûsya adirbirnayîşêk ame îmzakerdene. QSDyî zî peymane qebul kerde û hêzê xo qasê 20 kîlometreyan apey girewtî. QSDyî ra ber çew goreyê peymane tênêgêreno. Peymane ra dima Meclîsê Leşkerî yê Til Temîrî ame îlankerdene û hêzê bînî binê sîwanê Meclîsî ameyî yewca.

Dewletê mîyanneteweyî yê sey Rûsya ganî cade herême de mesuldarîya xo bîyarê ca, verê hêrişanê vera sivîlan bigêrê. Dewleta tirke wazena hêzanê xo herême de ca bikera û demmografîya herême bivurna, rayîrê M4î kontrol bikera. Ma nika kewtî serra 10. ya şerê Sûrîye.Til Temir de şarê asûrî, kurd û erebî pîya vera hêrişan xo ver danê. Şarê Til Temirî paştî dano hêzanê xo û şaristanê xo paweno.

Facebook û Twitter de tay provakasyonî vanê ke 'şaristan de çew nêmendo, şaristan bîyo veng.' La çîyo winasên çin o. Ma xeylêk şehîdî dayî, goonîya ma bîya yew. Ma do şaristanê xo ra fek vera nêdê. Nameyê Meclîsê Til Temirî ser o ma do heta çilka peyêne ya gonîya xo şaristanê xo de têkoşîn bikerê û tîya war nêverdê.''