Cenazaya şehîd Ferhat Şiblîyî bi merasîmêkê girseyî Goristanê Şehîd Xebat Dêrikî de ameye definkerdene. Bi desan hemwelatîyî, temsîlkarê MSDF, QSD, YPG, YPJ û Îdareyê Xoserî, temsîlkarê partîyanê sîyasîyan cenaza Nêweşxaneyê Dêrikî ra bi sloganan girewte. Dima cenaza pê konvoyan ameye çarnayene.

Goristanê Şehîd Xebat Dêrikî de verî Hemsereka Meclîsê Keyeyanê Şehîdan a Herêma Cizîre Selam Xelîl qisey kerd. Selma Xelîl ard ziwan ke keyeyê şehîdan do têkoşînî rê dewam bikerê û vera qirkerdişanê Tirkîya bêveng nêmanê. 

Endamê Heyetê Hemserekîya PYDyî Aldar Xelîlî zî vat: ''Şehîd Ferhadî her ca de têkoşîn kerd, 29 serrê xo dayî xizmetê dewaya şorişî. Ferhadêk şi la bi hezaran Ferhadê ma est ê. Nika koyanê Kurdîstanî de şer est o. Erdoganî vat ê do 30 km derbazê Sûrîye bibê la çareserîya raştikêne bihêzkerdişê rêxistina komelkî yo.''

Hemserekê Meclîsê Rayberdişî yê Rojawanî Ebid Hamid El Mihebaşî vat: ''Rejîmê Tirkîya bin kewto û raştê krîzan ameyo. Dewleta tirke seba ke binkewtişê xo binimna û xo sey serkewte bimojna embaz Ferhad hedef kerd. Ez venga hêzanê mîyanneetweyîyan dana ke dewleta tirke vindarnê.''

Vervatoxê YPGyî Nûrî Mehmûdî vat: ''Şehîd Ferhadî felsefeya cuya azade naye ro, şehîd Ferhad ruhê ma de weş o.Ey ronayoxê hêzanê leşkerîyan ê Rojawanî bi. Dişmen xizimkaranê nê şarî keno hedef. Hêzê ma amade yê ke qesasê şehîd Ferhadî bigêrê. Ma şerê azadîye kenê, şerê seferberîye kenê. Ma goreyê ney xo rêxistin bikerê.''

Dadîya Ferhad Şiblîyî Şêrîne zî vat: ''Ma qetî têkoşînê xo rê dewam bikerê. Ferhadêk şi la bi des hezaran Ferhadî est ê.''

Qiseykerdişan ra dima cenaza ameye definkerdene.