Nûjîyane Ocalana ke Kobanê de netîceya hêrişê dewleta tirke de şehîde bîye, Şehba de hetê bi hezaran kesan ra Şehîdgehê Xoverdayîşê Dewerî de ameye definkerdene.

Bi hezaran kesanê ke cenzaya Nûjîyane Ocalan Nêweşxaneyê Avrînî ra girewt ver bi Şehîdgehê Xoverdayîşê Dewerî yê qezaya Ehrasî kewt rayîr. Şehîdgeh de badê rêzgirwetişî Endamê Meclîsê Keyeyanê Şehîdan Menal Şêxoyî qisey kerd. Şêxoyî keyeyanê şehîdan rê serweşîye waşte û vat: ''Îşxalkerê tirkî bi metodanê cîya cîyayan kenê ke têkoşînê ma bişiknê. Tecrîdê serê Rayber Apoyî û hêrişê vera şarê Efrînî dewam kenê. Rayapêroyîya mîyanneteweyî hemkarê nê hêrişan a.  Ganî dezgehê huqûqî  helêke cuwar şirê Tirkîya ser ke hêrişê ci yê vera Rojawanî bêrê vindarnayene.''

Endamê Komîteya Perwedeyî yê Komelê Demokratîkî Avdar Eloyî belgeyê Şehîdê Nûjîyane Ocalan wend û teslîmê keyeyê ci kerd. Badê merasîmî Şehîdê Nûjîyane Ocalan bi sloganan ameye definkerdene.