Dewleta tirke 21ê gulane roja pancşemeyî dewanê Girê Sipî û Eyn Îsayî de adir vera axpînan. Saete 16:00 de pê topan dewê Xalidîyê û Hoşanî yê Eyn Îsayî ameyî bombavarnayene û şewato ke netîceya bombardumanî de qewimîya heta serê sibayê roja îneyî dewam kerd. Roniştoxê dewa Hoşanî semdo ke şewar resa keyeyanê înan neçare mendî ke keyeyê xo biterikne.

Çimeyanê herêmîyan da zanayene ke cergî heman wextî de derbazê rayîrê M4î bîyî ke herême bivêşnê. Dewleta tirke bi taybetî menga gulane ra nata hêrişê axpînan kena ke nê axpînî çimeyê debarî yê Federasyonê Rojawanî yê.

Goreyê doneyanê ANFyî sere de Girê Sipî, Bab, Eyn Îsa, Til Temir, Şêra, Şêrawa û Kobanê de destpêkê menga gulane ra nata 30 herêman de erazîyê zîretî yê hemwelatîyan ameyî vêşnayene. Şewatî tesîrê dewan û bi hezaran kesan kerd.

Dewleta tirke ya îşxalkere cerganê xo yê DAÎŞî reyde serra 2019î de bi se hezaran donim erazîyê zîretî yê Rojawanî vêşnabi û bi nê hawayî waştbi ke zera bida ekonomîyê herême. Goreyê doneyanê Komîteya Ekonomî û Zîretî ya Îdareyê Xoserî par 435 hezar û 500 donim erazîyê zîretî ameyî vêşnayene.