Hemserekê Heyetê Malîye yê Efrînî yê Îdareyê Xoserî Arif Şêxoyo ke di reyî Rayberê Şarê Kurdî Abdullah Ocalanî de pêvînayîş kerdo, derheqê wextanê verênan ê têgêrayîşê azadîye û tesîranê ci de ANFyî rê qisey kerd.

Arif Şêxoyo ke îşxalê dewleta tirke ra dima koçê Şehba kerdo, ard ziwan ke dima ke PKK ronîya Kurdîstan de hînî serewedaritişanê verênan ra dersî girewtbî.

Şêxoyî da zanayene ke o serranê 1980-90an de Haleb de xebitîyayêne û o çax ey di reyî Ocalan dîyo. Şêxoyî vat: ''O çax hêvîya şarê Kurdîstanî nêmendbî. Yew bingeyê şorişî çin bi. Serewedaritişê Barzanîyan zî bin kewtbî. La dima ke Rayber Apo û partîya ci vejîyayî meydan Kurdîstan de hêvîya şarî bîya gandar. Şaranê Heleb û Efrînî dima paştî daye Têgêrayîşê Azadîye yê Kurdan. O çax bi hezaran kesan waşt ke tewrê şorişî bibê la Rayber Apoyî qebul nêkerd.Çunke ey waştêne ke verî her kes şorişî hol fam bikero. Netîceya felsefe û îdeolojîya Rayber Apoyî de şarî pê têgêrayîşî bawer kerd û tewrê ci bi.''

Arif Şêxoyî îfade kerd ke têgêrayîşê azadîye pê fedakarîyan vejîyayo werte û vat: ''Rayber Apoyî girîngîye dayêne cuya komunale. Rayberîye çew cîya nêdîyayêne, ey her kesî de pêvînayîş kerdêne û fikrê şarî girewtêne. Ma zî goreyê netîceyanê ê pêvînayîşan têgêrayêne. O çax tarîx nusîya. Zîndan de kamî bizanayêne ke ma sempatîzanê PKKyî yê, pê ma hûrmet kerdêne. Şoriş nê esasî ser o ronîya. Hêzanê mîyanneteweyîyan netîceya komployî de Rayber Apo kerd esîr û înan va qey bi nê hawayî têgêrayîş do çin bibo. La PKK hîna bihêz bi û şarê kurdî hişyar kerd.''