Şorişê Rojawanî 9 serrî verî Rojawanê Kurdîstanî de qewimîya. Nê 9 serran de şoriş raştê xeylêk hêrişan ame la têkoşînê xo ra qetî fek vera nêda ke no şoriş rêçê xet, îdeolojî û felsefeya Rayberê Şarê Kurdî Abdullah Ocalanî teqîb keno.

Dima ke Vakurê Kurdîstanî de rayberîya çend ciwanan de têkoşîn dest pêkerd generalanê faşîstan ê dewleta tirke darbe kerd. Darbe ra verî Rayberê Şarê Kurdî 2ê temmuza 1979î de Pirsûsî ra derbazê Kobanê bi. Dima ke Abdullah Ocalan Kobanê ra derbazê Lûbnanî bi xeta şorişî de derbazê herême bîye. Ocalanî Lûbnan de verî bi zî Rojawan de dest pê rêxistinkerdişê şarî kerd.

Bingeyê Şorişê Rojawanî yo ke 19ê temmuza 2012î de Kobanê de qewimîyabi, hetê merdimanê rêxistinkerdeyan ra ronîyabi. Destpêkê serranê 1980î de merdimî Rojawan de ameyî birêxistinkerden û qezençkerdene. Nê kesan ra yew zî Mihemed Mahmûd o ke Kobanê ra yo. Mihemed Mahmûd bi nameyê Mehmet Xanî şinasîyeno ke no name Rayberê Şarê Kurdî dabi ci. 

Mehmet Xan 1960 de dewa Qeremoxî ya Kobanê de dadîya xo ra bîyo. Şert û mercanê ekonomîkan ra Mehmet Xan têna 8 serran şîyo dibistane. Mehmet Xan wexto ke seba karî şino Şam nameyê PKKgîran sey 'heval'  eşnaweno. Hayîya ey pê nê 'ciwananê Apogîran' estbîya la ey texmîn nêkerdêne ke înan bişinasno. Mehmet Xan heta 1983î Şam de maneno.

Dima ke 15ê tebaxa 1984î de têkoşînê gerîlayan dest pêkerd Mehmet Xan de zî zaf çi vurîyeno. Embazêkê ci 15ê Tebaxe ra çend mengî dima ey rê vano ''Tîya de tay hevalî estê, wazenê to bişinasê.'' Mehmet Xan zî çend embazanê xo reyde şino cayê Apogîran û dima museno ke nê Apogîran ra yew zî Hasan Bîndal o. Qiseykerdişê Bîndalî zaf tesîrê Mehmet Xan û embazanê ci keno. Mehmet Xan naye ra tepîya çend reyî reyna şino cayê Bîndalî.

Mehmet Xan pê pêşnîyazê Bîndalî tewrê karanê partîye beno ke o çax babîyê 5 domanan bi. Hetêkî ra Mehmet Xan înşaatan de xebitîyeno hetêkê bînî ra zî tewrê karê rêxistinîye beno. Mehmet Xan wazeno tewrê gerîlayan bibo la seba ke domanê ci estê no waştişê ci qebul nêbeno.

Mehmet Xan 2 serran şino leşkerîya mecburîye ya rejîmê Sûrîye la wexto ke leşkerîye keno zî tay kesan rê PKK dano şinasnayene.

Ocalanî şinasneno

Mehmet Xan 1989 de reya verêne Rayberê Şarê Kurdî vîneno. O bi wesîleya ronayîşê têgêrayîşî tewrê kombîyayîşêkî beno û ucade Ocalanî şinasneno. Rayberê Şarê Kurdî ê kombîyayîşî de qala tarîxê Kurdîstanî û rewşa şarî keno û peynî de wazeno persan bigêro. Mehmet Xan zî vano ke o wazeno tewrê gerîlayan bibo. Rayberê Şarê Kurdî tira vano: ''Domananê xo pîl bikere, înan bikerê şorişgêr ke ma pêro pîya şorê.''

Axir domanê ey benê pîl û hîrê tenê ci tewrê gerîlayan benê. O zî karê rêxistinîye rê dewam keno. Remzî Avci 1992 de wexto ke zîndanî ra vejîyeno tewrê Akademîya Mahsum Korkmazî beno. Mehmet Xan tira vano ke o wazeno şoro koyan. Remzî Avci qebul keno. Mehmet Xan çanteyê xo têkeno û paweno. 1993 de Şam de kampêka newîye abibî. Mehmet Xan seba viraştişê kampe şino.

Rayberê Şarê Kurdî Abdullah Ocalan o çax kampe zîyaret kenı. 1993 ra heta 1998î Mehmet Xan karanê viraştişê kampe keno. Serra 1998î de Komployê Mîyanneteweyî ra dima Rayberê Şarê Kurdî Mehmet Xanî rê vano: ''Na kampe hînî keyeyê to yo. Keyeyê xo bîyare tîya.'' Dima ke Rayberê Şarê Kurdî Sûrîye ra vejîya Mehmet Xan wextêk kampe de mend. O çax lajê ci Qehreman 2003 de Kelareş de şehîd bi.

Mehmet Xan û ê raywanê bînî yê têkoşînê azadîye kokê Şorişê Rojawanî yê. Mehmet Xan, hîrê domanê ci, birayê ci û merdimê ci bezreyê torranê şorişî yê.