Dewleta Tirkî ya  ke dimayê hamleyê Sûrîye ra ancîyayîşî yê serekê Amerîka Donald Trumpî mabênê Amerîka û Rûsya de mende û xeta Washîngton û Mokova de cigêrayîşê paştîdayîşî de ya, Minbic sey hedefo verên vîjna.

Dewleta Tirkî û çeteyê ci ke rojanê peyênan de hêrişê  Erîma ya Babî û vakurê Minbicî kenî, bînşewe zî  hêrşê dewa Boxazî ya Erîma û dewa Ereb Hesenî ya Mibicî kerd. ANFyî dîmenê rewşê peyên yê nê her di dewan antî.

XETA BAB-ERÎMA

Dewleta Tirkî û çeteyê ci hêrişê dewa Boxazî kerd la bi cewabdayîşê şerwanan, çeteyî peyser ancîyayî. Na dewe binê kontrolê Meclîsê Leşkerî yê Babî, Cebhed El Ekrad (Cepheyê Kurdî) û artêşa Sûrîye de ya. Dimayê gefanê îşxalî yê dewleta Tirkî îdareyê Vakur û Rojakewtena Sûrîye û hukmatê Sûrîye pêdîyayîşê dîplomatîkî viraştî û seba pawitişê herême Meclîsê Leşkerî yê Babî, Cebhed El Ekrad û artêşa Sûrîye qerarê pîya têgêrayîşê girewtbi.

XETA MINBIC-SACURÎ

Dewa Ereb Hesenî ya Mibicî ya ke hedefê hêrişî de ya, a zî  binê kontrolê Meclîsê Leşkerî yê Minbicî de ya û şerwanî bi cewabdayîşî hêrişan peyser açarnenê. Dewleta Tirkî û çeteyanê ci Sacûr sey sinorê mabênê Minbic û Cerablusî bewlî kerd. Yew serre ya  dewleta Tirkî  û hêzê koalîsyonî yê ke Amerîka rayberîya ci kena, xeta Sacûrî de dewrîye gêrenê.

PROPAGANDA

Dewleta Tirkî çend rojî cuwa ver bi vatişê ‘operasyon dest pêkeno‘  Îdlîb, Efrîn, Cerablus, Bab û Ezaz ra xeylî çeteyî  sewqê  sinorê Minbicî kerdîbî û medyaya Tirkî zî bi rojan na xebere servîs kerde la grubê sey Ehrar Şerqîye di rojî cuwa ver peyser agêrayîbî.

VATÊNE MIBIC, ÎDLÎB KEWT TÊMÎYAN

Dewleta Tirkî mabênê Washîngton û Mokowa de semedê destûrê îşxalî û paştîdayîşî nata- wata şina û yena. Hetê bînî ra grûbê ke dewleta Tirkî  Astana û Soçî de înan rê garantorê kerdêne Îdlîb de kewtî têmîyan. Rayberîya Cebhet El Nusra de grûbê  Heyet Tehrîr El Şam (HTŞ) di rojî cuwa ver Îdlîb de hêrişê gûrbanê çeteyanê Nuredîn Zenkî kerd. Hetê bînî ra teyarê yê  şerî yê Rûsya û Sûrîye  5 rojî yo Îdlîb de cayanê grûbanê cîhatkaran bombavaran kenî.

RENGÊ HAMLEYANÊ NEWEYAN DO ZELAL BIBO

Tirkîye ra heyetêk hewteyo ravêrte Moskova zîyaret kerd û vera qismekê Minbicî, peşnîyazê qismekê Îdlîbî kerdbi.Hetê bînî ra bazarîyê bi Amerîka zî dewam kenî. Dewleta Tirkî ra heyetêk do 8ê Çile de şiro Washington. Rojêk verê nê pêvînayîşî zî yeno pawitene ke şêwirmendê Asayîşê Neteweyî yê Amerîka John Bolton bêro Tirkîya. Dimayê nê pêvînayîşî rengê hamleyanê neweyan ê Tirkîye yê sahayê Sûrîye do zelal bibo.