Gama Tunus de 18ê Kanûne 2010 de ciwanêk xo vêşna û serewedartişê şarî dest pêkerd, seba şaranê Rojakewtena mîyanêne umîdê cimatê azad û demokratîkî bibi zergûn. Dimayê qewimîyayîşanê Sûrîye welat de şero zereyên vejîya. Netîce de Sûrîye ra 4 mîlyonî ra vêşêr kesan koç kerd, bi se hezaran kesan pêkewtişan de cuya xo vîndî kerde. Kurdanê Rojavayijan zî sîstemê xo azadîya komelkîye viraşt, bi hezaran ciwananê Kurdan zî seba pawitişê erdanê xo canê xo feda kerd.    

ŞARÎ HEM SÎSTEMÊ XO AWAN KERD Û HEM ZÎ XOPAWITIŞÊ XO AVER BERD

Kurdanê Rojavayijan çarçiwaya projeyê neteweya demokratîke ya Rayberê Şarê Kurdî Abdullah Ocalanî de sîstemê xo awan kerd. La dewleta Tirkî û Tayyîp Erdoganî seba vîndîkerdişê qezancanê Kurdan ê ke bi bedelanê pîlan bi dest fînabî roja ewilêne ya Şorişî ra hêriş kerd. Grûba çeteyan a bi nameyê Asîfet Şîmalî ke hetê dewleta Tirkî ra amîbî awankerdene serra 2012 de hêrişê dewa Êzidîyan Qestel Cîndo kerd. Şahidanê ê hêrişan ANFyî rê qisey kerd.  

 ‘HER KESÎ BI ÎMKANANÊ XO HEMVERÊ ÇETEYAN DE XOVER DA’

Dewijo bi nameyê Sîdo Sîdoyî vat: “Înan fermandarê çeteyan ra vatêne Omer Dedîgî, la fermandarê înan o esil Erdogan bi. Şarî bi sîlehanê basîtan hemverê hêrişan de xover da. Hewna ê wextan de YPG nêamebi îlankerdene, meclîsê ma estbî. Înan werê ma zî birna, seba ardişê werî zî ma şehîdî dayî. Eke paştîdayîşê şarî çinbîyêne no mucadele heta ewro nêameyêne.”

Qezaya Bilbilê ya Efrînî ra Ferît Osoyî zî nê vatî: “Ma ê wextan de hetê eskerîye ra hewna tam biorganîze nêbî. Înan çiqa hêriş kerd hemverê înan de zî şar ame pêser. Pêkewtişan 26 rojî dewam kerd. Dimayo ke çeteyan derbe girewt xo qilê Parse Xatûnî ra antî.”    

'MA 6 ROJÎ CEPHE DE ŞER KERD'

Dewa Qestel Cîndo ra Suwat Hiso vat: “Şarî bi sîlehanê şenikan hemverê çeteyan de xo ver da. Dima ra Efrîn ra mayê aşitî heta nuqteya asayîşî ameyî. Çeteyan hêrişê înan zî kerd, la mayan xo pey de nêant.”

Remedanê Bilbilijî zî vat: “A game ma dest de sîlehê ma çinbî. Tenya çend hebî sîlehê otomatîkî estbî. Sar zî ame paştî da ma û ma şeş rojan hemverê çeteyan de cephe de şer kerd.”

Elîyo ke qezaya Tirindê ya Efrînî ra yo vat: “Înan hîrê qolan ra hêrişê ma kerd. Ez ê şerî de di rojan menda.” Kal Mesûdî zî vat: “Verê mi de tenya keleşêk estbi. Heme şaran ra ê wextan de ma rê paştî dîyaye.” Kal Doganî zî nê vatî: “Sere de ez tewrê şerî bîya. Dima ra lajê xalê mi û dezayê mi tewrê ci bi. Ma xeylî cepheyan de şer kerd, şehîdî dayî û birîndar bîyî.”     

'MA DO XETA RAYBER APOYÎ Û YA ŞEHÎDAN RA NÊGÊRÊ A'

Dewa Qestel Cîndoyî ra Welat Efrînî vat: “Ma 15 kesî bî. Qilê Parse Xatûnî de tenya hewt sîlehê ma estbî. Çeteyan dewleta Tirkî ra sîleh girewtibi. Înan 3 rojan hêrişê ma kerd. Şar ame paştî daye ma. Dima ra înan hêrişê Efrînî kerd. Şarê Efrînî seba pawitişê bajarî her çîyê xo seferber kerdî. Şarê Efrînî zaf dej ant la qe teslîmîyet qebûl nêkerd. Tim vatêne ‘ma xeta Rayber Apoyî û ya şehîdan de yê.’”