Keyeyê Teybayî dewa Ramî ya herêma Koyê Zaviye ya Idlibî ra zulmê cerganê dewleta tirke ra derbazê Efrînî bi, dima koçê Minbicî kerd. Mahmud Teyba fermandarîya Tugayê Siwar Idlibî keno. Babîyê ci zî şerwanêkê tugayî yo, dadîya ey mîyanê Meclîsê Keyeyanê Şehîdan de kar keno û domanêkê keyeyî zî gerîla yo.

Fermandar Mahmûd Mûstafa Teyba (Ebû Leyl) ANFyî rê qisey kerd. Teybayî da zanayene ke koçî ra dima înan vera DAÎŞî şer kerd. Teybayî vat: ''Hêzê Sûrîyeya Demokratîke (QSD) wayîrê bingeyêkê serkewteyî yê. Armancê înan cergan û îşxalê Tirkîya ra pawitişê Sûrîye yo. QSD şaran cîya nêkeno, tede têdûştîye est a. 

Ez 2017 de tewra akademîya Azîz Arapî  bîya. Mi uca de fikrê Rayber Apoyî wendî, xo aver berd. Şehîd Azîz Arap şehîdanê têkoşînê azadîye ra yew bi ke 90an de tewrê têkoşînî bîyo. Ez akademî de nê çîyan musaya û ney zaf tesîrê mi kerd.''

Mahmud dima reyna agêreno Efrîn. 2018 de wextê hêrişanê dewleta tirke de Raco de o tewrê xoverdayîşî beno. Mahmud vano: ''Ez û 2 embazan 6 rojan ma birîndar mendî. Dima ke dewe ameye xelisnayene ma uca ra ameyî girewtene. Her kes wayîrê moralêkê pîlî bi. Tay embazan çalakîya fedayîye kerde. Yanî ma de îradeyêko bêhempa est bi. Hemleya Baxozî de armancê ma yo verên xelisnayîşê Idlib û Efrînî bi. Ma nika zanenê ke Idlib her roje dîyeno bombayan ver. Her kes zaneno ke Cebhet El Nûsra domanê DAÎŞî yê. Şarê Idlibî nêeşkeno sereyê xo wedarno çunke zaneno ke cergî do sereyê înan bibirnê. Şar ameyo tersnayene.''