Elî Bekîr (64)o ke Dirbêsîyê ra yo, Qirkerdişê Helebçe ra dima 1988 de têgêrayîşê azadîye şinasna û 35 serran o mîyanê têgêrayîşî de têkoşînê azadîye keno. Di kênayê ey Gulîstane û Rûkene zî mîyanê têkoşînî de şehîd bîyî. Elî Bekîro ke têkoşînê xo yê 35 serran de di kênayê xo şehîd dayî, rixmê îşkenceyê rejîmê Baasî zî rayîrê xo anêgêra. Her roje bi keyeyanê şehîdan eleqedar beno û têkoşînê xo rê dewam keno.

 Elî Bekîrî ard ziwan ke o tim perwerê têgêrayîşê azadîye bîyo û vat: ''Milîtananê têkoşînê azadîye zaf fedakarîye kerdêne, ney zî bala mi ante. Dima ez zî tewrê milîsanê têkoşînî bîya. Rejîmê Baasî 7 reyî ez tepişte û mi rê îşkence kerd. O çax rejîmî embazê ma remnayêne û kerdêne vînî. La ma qetî rayîrê xo ra anêgêrayêne. Ma tim şarî rê qala Rayber Apoyî kerdêne. 1995 de ez pa embazan şîya û mi Şam de Rayber Apo dî. Ma hîrê saetan cayê ey de vindertî. Ey fikrê neweyî vatêne, rexne kerdêne, analîzî kerdêne.''

Elî Bekîrî îfade kerd ke pêvînayîşê bi Rayberê Şarê Kurdî Abdullah Ocalanî ra dima metodê ci yê têkoşînî vurîyayo û vat: ''Nê têkoşînî de gonîya şarê ma rijîyaye, şarê ma bedelê giranî dayî. Mi ê pêvînayîşî ra dima xebatê xo newe ra ercnayî û mi kêmasîyê xo dîyî. Mi bire daye ke keyeyê xo zî tewrê têkoşînî bikera. Keyeyê mi ra tayî tewrê karanê kultur û hunerî bîyî, tayênî zî tewrê karanê ziwanî bîyî. Gulîstane û Rûkene zî bire daye ke bibê gerîla û ma zî înan rê asteng nêbîye. Dima ke ê şehîd bîyî zî sereyê ma tim pê înan berz bîyo û ma têkoşînê înan rê dewam kerd.''