Şaristanê Draguignanî yê Fransa de sîyasetmedar Îdrîs Balukenî kombîyayîşê şarî de qisey kerd. Kombîyayîşê şarî de qalê ‘Vengdayîşê Haştîye û Komelê Demokratîkî’ yê Rayber Apoyî’ ame kerdene. Tîya de Balukenî mesajê girîngî dayî.

Balukenî bi kurmanckî û kirdkî qisey kerd û îfade kerd ke ganî şarê kurdî yê Ewropa sey verî nika zî wayîrê têkoşînê xo vejîyo.

Balukenî ard ziwan ke qet yew hêz nêeşkeno verê îradeyê şarî de vindero û vat: ‘’Şarê ma yo Ewropa sey vizêrî ewro zî ganî wayîrê keda xo vejîyo, têkoşîn bikero û mîsyonê xo bîyaro ca. No şar fedakar o, seba azadîye bedelan dano. Ez wazena şima bizanê ke her wextî ra zafêr ma nêzdîyê azadîye û ameyoxêkê azadî yê. Êyê ke wazenê estbîyayîşê xo awan bikerê do ser bikewê.’’

Balukenî dîyar kerd ke paradîgmaya Rayber Apoyî ya newîye tena seba şarê kurdî ney seba tirkan û şaranê Rojhelatê Mîyanênî zî çimeyêko hêvî yo û vat: ‘’Ganî kurdê welatperwerî wayîrê nê têkoşînî vejîyê.’’