Endamê Heyetê Serekîye yê PYDyî Salîh Muslîmî serrgêra 9ê teşrîna verêne de cewab da persanê ANFyî.

Salîh Muslîmî 9ê teşrîna verêne sey tarîxê qerî name kerd û nê vatî: ''Belka ma sere de manaya 9ê teşrîna verêne tam fam nêkerd la çend şino dahîna hol yeno famkerdene. Ma nika vînenê ke 9ê teşrîna verêne destpêkerdişê prosesêkê newî yo. Seke yeno zanayene verî hêzanê hegemonîkan qala Projeyê Pîlî yê Rojhelatê Mîyanênî kerdêne. Yeno vînayene ke serê masayan de planê girdî ameyî kerdene. Planê ke nika yenê caardene bi 9ê teşrîna verêne de dest pêkenê. Înan verî waşt Rayberê Şarê Kurdî Abdullah Ocalanî werte wedarê. Senî ke waşt wina nêbi la esîr ame girewtene û Tirkîya rê ame teslîmkerdene. Plankerdoxê nê Tirkîya nêbî. Hêzanê Mîyanneteweyîyî no kerd. Ewro sebebê nê komployî dahînî zelal yenê vînayene. Komplo têna vera Ocalanî nêbi, vera heme Rojhelatê Mîyanênî bi. No komplo gama verêne ya Projeyê Pîlî yê Rojhelatê Mîyanênî bi.

Pîya bi na game hazirîye û cehdkerdişê neweyî bîyî. Hêrişê vera Iraqî û Mutabakatê Adana netîceya nê bî.  9ê teşrîna verêne ya 2019 de hêrişê Serêkaniyê û Girê Sipî kerd. Serrekê dima ra reyna 9ê teşrîna verêne de narey  Hewlêr de Şingalî ser pêkerdiş kerd. Hema zî eynî tarîxî de hêrişanê xo rê dewam kenê. 2012 de hela ke înan dî ma senî hêzdar bîyî înan waşt ma dê bibê 'dost'  û ma zî semedê menfeatê şarê herême tim dîyalogî rê akerdebî. Bi nê esasî ma şîyî Tirkîya. Ma dî ke wazenê ma bikerê leşkerê xo, bifînê xizmetê xo. Ma nê kayî rê nêxapîyayî. Ma vat nasnameyê ma qebul bikerê ke wa problemî bêrê çareserkerdene. Seba ke maa xizmetê înan nêkerd DAÎŞ verda ma ya. Seba ke sey înan nêbi proses bedilna û hêrişê ma kerd. Xora planê înan têna Rojawan nîyo, vera pêro Kurdîstanî yo.

Tirkîya hetêkî ra hêrişê Rojawanî kena hetê bînî ra bi xebatanê sîyasîyan ma sey terorîstî ramojnena, welatê Ewropa tehdît kena ke heqê ma nêrê naskerdene. Her ca de berî rîyê ma rê yenê qefilnayene. Xora tekîlîya ma bi hêzanê demokratîkan xurt a la dewletî semedê menfeatê xo ma rê nêzdî nêbenê. Çunke Tirkîya înan rê şantaj kena. Meseleya Neteweyanê Yewbîyayeyan û Parlamentoyê Ewropa de sey fermî roniştişê ma qebul nêkenê.  Netîceya hêrişanê sîyasîyan ê Tirkîya de xeyêk dezgehî ma qebul nêkenê.

Dewleta tirke çekanê qedexeyan şuxilnena, sûcê şerî kena, vera merdimîye qirkerdiş kena. Teberê nê de hêrişanê wehşîyan kena. Hem bi destê xo hem bi destê çeteyanê xo verê çimanê dinya de hêrişan kena. Nê hêrişî têna vera nuqtayanê leşkerî nê vera waranê sîvîlan yenê kerdene. Vera ma her qeyde hêrişî yenê kerdene.  Demê peyênî de kena ke bi rejîmî pêvînayîşan bikero û vera ma hêrişê hemparî bido destpêkerdene. Ma sey Rojawanî vera heme hêrişan hazir ê. Şarê ma çend rêxistinkerde têbigêro hend eşkeno xo bipawo. Dişmen tim wazeno şaran biverdo yewbînan. Ganî ma vera nê hîşyar bê. Ma sey heme şaran hewceyê pîya ciwîyayîşî yê.''