Reqa wexto ke binê îşxalê DAÎŞî de bi, zilm û zordarîya çeteyan ra tewr zaf cinîyan dejî antî. Cinîyî bazar de sey kole ameye rotene, îşkenceyê girdî dîyî, keyeyan de ameyî hepis kerdene û ameyî qetil kerdene. Hêzê Sûrîyeya Demokratîke (QSD) bajarî çeteyan ra xelisna û şarê Reqa azade kerd. Xelisnayîşê bajarî ra dima cinîyan her cayê cuye de gamê girdî eştî. Cinîyî rêxistinkerdeyî xebatanê sîyasî, leşkerî û ekonomîke de ca gênê û rolê ke înan rê ameyî dîyar kerdene, bedilnenî.

Meclîsê Cinîyanê Reqa de 7 komîteyî estî û meclîs her cayê cuye de xo resneno cinîyan û paştî dano cinîyan. Heto bîn ra zî cinîyê meclîsî hewte de reyêk semînerê perwerdeyî virazenî.

Endama Meclîsê Cinîyanê Reqa Xalîye El- Kecwane dîyar kerde ke ê seba heme cinîyanê Reqa xebitîyenê û wina va: “Cinîyê Reqa bi serran o zilm vînenî, la ma nika wazenê rolê ke ma rê fesilyayî, bibedilnê. Ma bi xebatanê xo komelî rê rayberîye kenî û qederê xo bedilnenî. Reyna seba cinîyan û qijan xeylê projeyê ma yê bînî zî estî.”