Hêzanê Sûrîyeya Demokratîke (QSD) bîlançoya hêrişê dewleta tirke ya îşxalkere û çeteyanê ci yê yê di hewteyan ê vera Rojawanî eşkera kerde.

Eşkerayîye de ame vîrvîstene ke di hewteyanê verênan ê serra 2022yî de zî hêrişê dewleta tirke û çeteyanê ci yê vera Rojawanî ameyî dewamkerdene û ame vatene ke hêrişanê vera Mibic, Kobanê, Eyn Îsa, Til Temir û Dirêsîyê de sîvîlî ameyî hedefgirewtene. QSDyî da eşnawitene ke dewleta tirke seba ke hêrişanê xo meşrû bikerê îdîa kena ke înan şerwanê şehîd kerdî la raştî de bi hêrişê vera hemwelatîyanê ma wazena herême de kaos vejo û DAÎŞî newe ra ganî bikero.

Eşkerayîye de derheqê hêrişan de nê ameyî parekerdene: Artêşa tirke ya îşxalkere  û çetayanê ci di hewteyanê peyênan de pê hewan, obus û tankan vera Kobanê, Girê Sipî, Eyn Îsa, Til Temir, Zîrgan, Minbic, Til Rifat û Şehba tewr tay 225 rey hêriş kerd. Netîceya nê hêrişan de 31 hemwelatîyî birîndar bîyî û yew hemwelatîyî dinyaya xo bedilnaye.