Herêma Cizîre ya Rojawanî ya ke pê zîretê xo namdar a, semedo ke dewleta tirke awe birnaye ziwa bena. Rêxistinê heqanê merdiman hişyar kenê ke nê kerdişê dewleta tirke eşkenê binê sebebê krîzêkê neweyî yê merdimîye.
Herêma Cizîre ya Rojawanî pê zengînîya erdê xo şinasîyena. La hetêkî ra dewleta tirke awa ci birnena hetê bînî ra zî cergî erdê ci talan kenê. Çemê Xabûrî verî erazîyanê herême rê vejîyayêne la kêmîyayîşê awe ra dima herême seke vurîyena çolêk.
Dewleta tirke bi hawayêkê sîstematîkî awa Cizîre birnena ke nika Sûrîye krîzo tewr pîl kêmbîyayîşê awe yo.
Rêxistina Haştîye ya Hollanda (PAX) no hewte derheqê mesele de raporêk weşana. Rapor de ame vatene ke dewleta tirke ya îşxalkere û cergê ci awe pêsnaye û netîceya ney de Çemê Xabûrî ziwa bîyo.
Vervatoxê Hêzanê Sûrîyeya Demokratîke (QSD) Aram Henayî rojnameyê Timesî yê Britanya rê qisey kerd û vat: ''Dewleta tirke pê pêsnayîşê awa Rojawanî vera merdimîye sûcî kena. Heyf ke kes vera ney vengê xo nêvejeno.''
Rojnameyê Timesî xebera xo de pare kerd ke dewleta tirke awe sey çeka şerî xebitnena û no zî beno sebeb ke awa Sûrîye kêm biba.
Citkarê herêma Dêra Zorê Casim Mihemedî ard ziwan ke înan emser genim nêçina û no zî do peynîya şarî bîyaro.
Goreyê raporê Ajansê Hawarî Sûrîye de 5 mîlyon kesî, Iraq de 7 mîlyon kesî bêawe mendî û coka wird welatan de zî genim tay o. Ajansî hişyar kerd ke eke wina dewam bikero alozîyêka newîye do virazîya û no zî ibo sebebê koçberîye.
Rêxistina Hetkarîye ya Mercy Corpsî zî bale ante kêmîya awa pakîye ya herême û îfade kerd ke bi hezaran domanî awa pîse ra nêweş kewtî. Rêxistine da zanayene ke peydakerdişê awe de hewt kesî kanalanê awdayîşî de fatisîyayî.
