Berpirsîyarê Çapemenîye yê QSDyî Ferhat Şamîyî rewşa herême û hêrişê dewleta tirke yê vera Rojawanî ANFyî rê ercnayî.

Qiseykerdişê Şamîyî ra beşêk wina yo:

''Dewleta tirke zî DAÎŞî zî hêrişê vera Rojawanî de yew armanc ser o vindertî; îşxalê herême û şiknayîşê îradeyê şarî. Tirkîya bi xo paştî dabî DAÎŞî nika zî cerganê herême reyde têgêrena. Tirkîya xoverdayîşê Kobanê de fam kerd ke a pê destê cergan nêeşkena herême îşxal bikera coka raşta raşt bi xo hêrişê herême kerd û Cerablusî ra heta Ezaz, Bab û Efrînî îşxal kerd. Mumkîn nîyo ke bêpaştdayîşê hêzanê mîyanneteweyîyan dewleta tirke nê hêrişan bikera. Îşxalê Girê Sipî û Serêkanîyê zî pêkerdişê Trump û Erdoganî ra dima qewimîya.

Qet yew îşxalê Tirkîya sey waştişê ci netîce nêdaye. Heta ke yew cayê ma zî binê îşxalî de bibo ma rê sebebê têkoşînî virazîyeno. Dewleta tirke bi giranî hêrişê sivîlan kena û armanc kena ke şar pê zorî bida koçkerdene, herême veng bikera û bêîstîkarar bikera.  10 rojanê peyênan de hêrişî zêdîyayî û nê hêrişan de zaf sivîlî merdî.

Ma zanenê ke Tirkîya mîyanê krîzanê pîlan de ya. Tirkîya hetêkî ra Başûrê Kurdîstan de zî şer kena. Şer yeno manaya malîyetî. Tirkîya ekonomîya xo semedê şerî xerc kena. Dewleta tirke qaşo semedê şerê vera DAÎŞî kewte Sûrîye la vera DAÎŞî şer zî nêkerd. Axir DAÎŞ qedîya. Sebebê Tirkîya çin o ke tîya de bimana. Her ke şer beno xorin dewleta tirke hîna bena tenge. Tirkîya Rûsya ra tay waran wazena la Rûsya Tirkîya ra wazena ke herême ra vejîya. Reyna cergan zî vatêne qey ê herêman de ca bibê la werte de mendî. Nika nê cergê Tirkîya her roje kewenê pê. Ma pê dokumentan zanenê ke Tirkîya bi xo wazena cerganê Hemzetî çin bikera.

Tirkîya wazena Rojawan bêîstîkrar bikera, tede kaosan viraza ke DAÎŞ newe ra gandar bibo. Tirkîya plananê xo yê Afganîstan, Lîbya, Azerbaycan, Yemen û Başûrê Kurdîstanî de bin kewte. Nê pêro Tirkîya ser o teda kenê. Dewleta tirke hetê ekonomîk, sîyasî û dîplomatîkî binê krîzêkê pîlî de ya. Tirkîya şovenîzm kena û pê hêrişkerdişê vera her cayî kena ke krîzî ra bixelisa. La ma do nêverdê ke dewleta tirke hêrişanê xo de ser bikewa.

Hêzanê garantoran heta nika vera hêrişanê Tirkîya nêrazîbîyayîşê xo nêmojna. Ma pê hêzê xo pê şarê xo bawer ê. Xora hetkarîya înan a bi ma girîng a la gereka verî ê vera Tirkîya vengê xo vejê. Ê vanê 'Ma vera DAÎŞî tîya de yê, qarişê Tirkîya nêbenê.' La Tirkîya îstîkrarê herême xeripnenê. Eke îstîkar xera bibo DAÎŞ newe ra gandar beno. Xora mîyanê cerganê Tirkîya de xeylêk cergî pabesteyê DAÎŞî yê. Ne Rûsya ne zî Amerîka vera Tirkîya tênêgêrenê.

Ma sey QSDyî armanc kenê ke herêmanê îşxalkerdeyan bixelisnê. Ma şehadetê embaze Sosine de zî vat ke nê hêrişî do bêcewab nêmanê. 1ê tebaxe de QSD kombîyayîşê xo yo serrane kerd û 3 birê girîngî girewtî; azadkerdişê herêman ê îşxalkerdeyan, qedînayîşê hucreyanê DAÎŞî û caardişê aramî û îstîkrarê herême. Ma şarê xo rê soz da ke nê biran bîyarê ca. Ma do nê sozê xo teqîb bikerê.''