Ewro Vakurê Kurdîstanî de Dewaya Kobanê dest pêkena ke tede 108 sîyasetmedarî yenê muhakemekerdene. Şerwananê Kobanê qala xoverdayîşî kerde û Dewaya Kobanê ser o qisey kerd.

Şerwana YPJyî Çîçeke Dûlîya ke wextê xoverdayîşî de milê xo ra birîndar bîye vat: ''Şorişê Rojawanî Kobanê ra dest pêkerdbi.Coka DAÎŞî verî Kobanê kerd hedef. O çax şarê Vakurdî vejîya serê sînorî. Ma sloganê înan tîya ra eşnawitêne. Nika şexsê HDPyî xoverdayîşê Kobanê yeno muhakemekerdene. Na dewa yena manaya paştdayîşê DAÎŞî. Ê wazenê qesasê binkewtişê DAÎŞî bigêrê. Xoverdayîşê Kobanê pêro merdimîye pawite. Ganî herinda HDPyî de DAÎŞ bêro muhakemekerdene.''

Şerwanê YPGyî Zerdeşt Dilovanî vat: ''Wextê xoverdayîşê Kobanê de dewleta tirke paştî dayê cergan. Dewaya Kobana dewayêka sîyasî ya. Ê wazenê qesasê çinkerdişê DAÎŞî HDP û şarê Vakurê Kurdîstanî ra bigêrê..''

Şerwanê YPGyî Canpolat  Fedakaro ke gazîyê xoverdayîşê Kobanê yo vat: ''Wextê hêrişanê DAÎŞî de ma xo ver da. Şarê Vakurê Kurdîstanî bi mengan û rojan serê sînorî de xo ver da. Şarî sînorî wedaritî, hêz da ma. Tirkîya serfîrazîya Kobanê qebul nêkerda. Tirkîya dişmenîya kurdan û Rojawanî kena. Coka Dewaya Kobanê akerde. Ganî merdimê azadîwaştoxî nêverdê ke şexsê HDPyî de xoverdayîşê Kobanê bêro muhakemekerdene.''