Fermandarê Pêroyî yê QSDyî Mazlûm Ebdîyî Ronahî TVyî rê qisey kerd. Ebdî qiseykerdişê xo de xeylêk babetî ercnayî.

Mazlûm Ebdîyî ard ziwan ke dewleta tirke nêwazena çareserîyî aver şorê û vat: ''Lîbya de zî Rojawan de zî armancê dewleta tirke heman ê. La dewleta tirke hînî nêeşkena sey parî her ca îşxal bikera. Şertê herêmî û globalî vurîyayî. Rejîmê Sûrîye zî bi heman hewayî keno ke serdest bibo la ne şertê mîyanneteweyî ne zî şertê înan ê neteweyî nêverdenê ke Rejîmê Sûrîye bibo serdest. Coka ganî meseleya Sûrîye pê dîyalogan çareser biba. Çimê mi de serra 2021î de firsendê çareserîya demokratîke do bizêdîyê. Ma seba nînan do amade bibê û ganî şarê ma zî amade bibo.''

Ebdîyî bale ante tehlukeyê DAÎŞî ser û vat: ''Ma tim Koalîsyonê Mîyanneteweyî zî hîşyar kenê ke têkoşînê DAÎŞî de xeletî nêkero. Çunke eke no têkoşîn sist bibo DAÎŞ seba pêro dinya do reyna bibo tehluke.''

Mazlûm Ebdîyî pêvînayîşê yewîya neteweyîye yê Rojawanî ercnayî û vat: ''Wextêkî ra nata ma mabên da pêvînayîşan û tay sebebê na rewşe estê. La pêvînayîşî reyna do dewam bikerê. Çarçewa nê pêvînayîşan de ma tay xebatî kerdî, tay meseleyî çareser kerdî. Ma tewirê vera îşxalkeran ser o, îdarekerdişê Rojawanî, beşdarîya Îdareyê Xoserî ser o pêkerd.Tay meseleyê nakokî estê la ê zî do çareser bibê. Ganî Rojawan de ma yewîya xo bîyarê ca. Ganî her kes seba serkewtişê nê pêvînayîşan bixebito.''

Mazlûm Ebdîyî alozîya ke pê sewqîyatê leşkerî yê PDKyî dest pêkerd û xîretanê haştîye ser o vat: ''Çew paştî nêdano şerê zereyî. Ez zî tewra kombîyayîşê KNK û Yewîya Parlamenteran bîya. Nê prosesî de qet yew kesî perrê şerî nêgirewt. Pêro partîyî vera şerê zereyî vindertî. Şerê zereyî do têna zerar bido destkewteyanê kurdan. Kamyew partî nê şerî bikera kurdî do aye efû nêkerê. Ma zî sey hêzanê Rojawanî vera şerê zereyî tewir gênê. Sey verî ganî PKK û PDK meseleyanê xo pê dîyalogan çareser bikerê. Eke înan ra yew şer bido destpêkerdene Rojawan zî do tira zerar bivîno. Êyê ke xo sey 'hêzê neteweyî' vînenê ganî nê şerî ra dûrî vinderê.''

Mazlûm Ebdîyî derheqê meseleya Şingalî de îfade kerd ke ganî îradeyê şarê Şingalî bibo esas. Ebdîyî vat: ''Ma na mesele de tim hetê şarê Şingalî, hêzanê sey YBŞyî de yê. Xora ma dostanê xo rê zî na mesele de hetkarîye bikerê.''