Minbic de 16ê Çele de hêriş amebi kerdene û nê herişî de 2 leşkerê Amerîka  yew wezîfedarê ewlehî, yew tercuman, 2 leşkerê Meclîsê Minbicî û 9 sivîlî amebî kiştene.

Derheqê  Surîye ra peyser antişê leşkeran ê Amerîka û herêma ewlehîye de munaqaşayî dewam kenê û demêko winasiyî de, leşkerê Amerîka û sivîlan rê hêriş ame kerdene. Her çiqas ke DAÎŞ hêrişî bigîro xo ser zî, îşaretî grubê Qalxanê Firatî yê ke bi hemkarîya Tirkîya têgêrenê, nîşan danê.

Serekê Fermandarîya Pêroyî ya Tirkîya Yaşar Guler û Serekê Fermandarîya Pêroyî ya Amerîka  Joseph Dunford qerargehê NATO yê Brukselî de amebî têhet û no hêriş zî eynî wext de ame kerdene. Fermandarê Meclîsê Leşkerî yê Minbicî Mihemed Ebû Adîlî no derheq de beyanat da ANFyî.    

TEHQÎQAT AME DESTPÊKERDENE

Adîlî beyanatê xo de vat ke Minbic de naye ra ver zî hêrişî ameyî kerdene la no hêriş, vera leşkeranê Amerîka hêrişêko newe yo. Adîlî keyeyanê merdeyan rê serweşîye waşte û wina va:“ Ma tehqîqat dayo destpêkerdene û seba ewlehîye tedbîrî girewtî. Heta nik ma senî ke şarê xo pawito, ma do naye ra dima zî bipawê.“

BINÊ PÊROYÊ HÊRIŞAN RA GRÛBÊ QALXANÊ FIRATÎ VEJÎYAYÎ

Adîlî wina qisey kerd: “DAÎŞî no hêriş girewt xo ser. La tayê hêrişê ke reyna înan girewtîbî xo ser, pey cû bîyî eşkera ke grûbanê girêdayîyê Qalxanê Firatî kerdê. Xeylî kesî amebî tepiştene û nê kesan îtîraf kerdbî ke endame grûbanê Qalxanê Firatî yê. Ney hucreyê nimte yê Qalxanê Firatî yê û ma nê xo ra kerdîbî eşkera. Grûbanê Qalxanê Firatî yê ke girêdayîyê îstîxbaratê Tirkîyaye, naye ra ver zî Minbic de hêrişê organîze kerdîbî.“

PEYNÎYA  HÊRIŞANÊ PEYÊNAN DE MÎT VEJÎYENO

Adîlî  vist vîrî ke serekê Fermandarîya Pêroyî ya Tirkîya Yaşar Guler û serekê Fermandarîya Pêroyî ya Amerîka  Joseph Dunford qerargehê NATO yê Brukselî de amebî têhet û no hêriş zî eynî wext de ame kerdene û wina dewam kerd: ‘‘ Xora 27ê Gulane 2014î de yew qeyde vengî amebi weşanayene û vejîyabi werte ke MÎT û îdarekarê o demî yê hukmatî  kombîyayîşêk viraşte û  seba ke hêrişê Sûrîye bibo, planê leyminî viraştî.

Hetê bînî ra seke dewleta Tirkî Tebaxe ya 2016î ra kewta Cerablusî, Minbic de hemê hêrişê ke şar û hêzanê pawitişî rê bîyî heme hetê dewleta Tirkî û çeteyanê ci ra yenî viraştene. Wextê ko Vakur û Rojakewena Sûrîye de hetê rêxistina (Kiyam) a ke pabesteya MÎT û DAÎŞî ya hêrişê sabotajî û sûîqastî yenî viraştene.‘‘

MUCADELEYÊ MA DO DEWAM BIKERO

Adîlî  qiseykerdişê xo wina qedîna: ‘‘Minbic de huzur esto. La grûbê Qalxanê Firatî yê ke girêdayîye Tirkîyayê kenê ke nê huzurî bixerepnê û alozîye bifîyê kar. Vera nê mucadeleyê ma do dewam bikero.“