Vervatoxa Hemserekîya Îdareyê Xoserî ya Rojawanî Emîne Osê  Derheqê hêrişê dewleta tirke yê vera Rojawanê Kurdîstanî de ANFyî rê qisey kerd.

Osê bale ante ser ke dewleta tirke verê çimanê dinya de her hetî ra hêriş kena la dezgehê mîyanneteweyî vera nayî nêvejîyenê û vat: ''Têna ge-ge eşkerayîyan danê. La no qîm nêkeno. Ganî nê dezgehî semedê çareserkerdişê mesele berpirsîyarîye xo bîyarê ca.  Dewleta tirke vera şaranê Vakur û Rojhilatê Sûrîye heme metodanê hêrişî şuxulnena. Pêro tekîlîyê xo yê sîyasîyî fînayî dewre, destê înan ra çi yeno kenê. Herêmê sîvîlan bombarduman kenê. Heme bêrî girewtî, ambargo kenê. Xora girewtişê nê beran beno sebebê zehmetîyanê pîlan. Nika janê Korona zî esto. Îmakanê Îdareyê Xoserî qîm nêkenê. Coka jan vila beno. Hetê bînî ra awa Firatî birnenê. Sûcê  şerî kenê. Yew şar hetêkî ra tim binê hêrişê leşkerî de yo, hetê bînî ra pê vêşanîye û têşanîye yeno waştene ke bêro mirênayene.

Nê sûcê şerî yê. Nê pêro verê çimanê Rûsya de de benê ke qaçîko garantorê herême ya. Bitaybetî babeta awe de gerek dezgeh û hêzanê mîyanneteweyî nêrazîbîyayîş ramojnê. Ma sey Îdareyê Xoserî ma xebatê dîplomatîk û huqûqî kerdî. Bitaybetî meseleya awe ma waşt serê Rûsya ra hal bikerê. Garantorê nê îtîfaqî Rûsya ya, la cehdkerdişê ma netîce nêgirewt.

Eşkerayîya Neteweyanê Yewbîyayeyan netîceya tewiranê ci ya. Mesele têna meseleya awe nîya. Heme hêrişê ke tîya vera şaran benê verê çimanê înan de benê. Meseleyê ekonomîkî, meseleyê nêweşîya Korona, nê hemeyan vînenê û ferq kenê. Herinda eşkerayîyan de ganî çîyêk bikerê. Xora eke înan çareserî biwaştêne nika ramojnabi. Eke tedbîrî bêrê girewtene verê koçbarkerdişî yeno girewtene. Her kes bitaybetî dezgehê mîyanneteweyî ganî şirê Tirkîya ser ke awe bêro veradayene.

Têna eşkerayîye nêvejenê, ganî çareserî bêro afernayene. Ma sey Îdareyê Xoserî heme îmkananê xo seferber kenê la na têna meseleya ma nîya. Şarê ma  na herre de zaf kede daye. Vera zehmetîyan fedakarîye kerde. 2013 de ambargoyo gird bibi,  reyna het 2015 ma mîyanê şerêkê pîlî de bê. Şarê ma, îdareyê ma û hêzê ma xover da. Ma no proses wina xo dima verda. Ewro ma reyna şerêkê leyminî de xover danê. Dewleta tirke her firsat de hêriş kena.

Her herêma Vakur-Rojhilatê Sûrîye de sîyaseto cîya yeno caardene. Sîyasetê ambargoyî, sîyasetê awe, sîyasetê bedilnayîşê demokrafîkî, pê metodanê cîya cîyayan yê şerî wazenê şarî eciz bikerê, bêhêz biver dê. Şarê Efrînî ke Şehba de maneno dewleta tirke verê çimanê ci de erdê ci de banan virezena û teberê Sûrîye ra merdiman ana tede ca kena. Daranê şarî ke sey domananê xo weye kerdî verê çimanê ci de birnena. Nê pêro psîkolojîya şarî ser o zaf tesîr kenê. Xora qet yew dezgehê mîyanneteweyî vera şarê Efrînî ke bi serran o Şehba de maneno wezîfeyê xo nê ard ca. Îdareyê Xoserî wayîrê înan vejîyeno la heta ke hetkarî resneno Şehba bi hezaran rey raştê astengîyan yeno. Dewleta tirke sucê şerî û merdimîye kena  û seba ke hêzê mîyanneteweyî verê nê hêrişan nêgenê ê zî binê tohmet de yê.''