Netîceyê trafîkê dîplomasî yê mabênê Moskova-Şam û xeta Vakurê Sûrîye yo ke dimayê gefanê îşxalî yê dewleta Tirkî dest pêkerd hêzanê Sûrîye û Rûsya vizêr hêzê xo şirawitî şaristanekê Erîma yê Babî, hêzanê xopawitişî yê herême dir kewtî têkilî.
Serekkomaro Tirk Tayyîp Erdogano ke hîrê serranê peyênan de Amerîka ra vano "Sûrîye ra vejî" û dimayê qerarê "ancîyayîşî" zî na rey vano "mevejîyê, ma pîya bixebetîyê" roj bi roje gefanê xo yê hemverê Vakur û Rojakewtena Sûrîye hîna keno vêşî.
Dewleta Tirkî ya ke şaristanekê Erîma yê Babî rê û xeta sînorê Minbicî rê xeylî çeteyî sewq kerdî, do ewro pêvînayîşanê xo yê Moskova de seba îşxalî Rûsya dir masaya bazarîye de ronişo.
ERÎMA DE BEYRAQÊ RÛSYA, SÛRÎYE Û EL EKRADÎ
Hetêna ra Îdareyê Vakur û Rojakewtena Sûrîye wextêko derg bi ke rejimê Sûrîye, Rûsya, dewletanê herême û dewletanê Eropa dir dîplomasîyêka vêşîye kerdêne.
Netîceyê pêvînayîşan de hêzê reijmî yê Sûrîye vizêr bi Meclîsê Eskerî yê Minbicî dir bikkordîne şaristanekê Erîma rê hêzo eskerî şirawit. Meclîsê Eskerî yê Babî, Meclîsê Eskerî yê Minbicî û Cephet El Ekradê ke Erîma de yê pîya bi hêzanê ke ameyê asayîşê sînorî gênê. Ameyoxê na hemparî zî girêdayeyê pêvînayîşanê dîplomatîkan ê mabênê Îdareyê Vakur û Rojakewtena Sûrîye, Rûsya û hukmatê Sûrîye yo.
TIRKÎYE WAZENA POZÎSYON BEWLÎ BIKERO
Şarê herême hetêk ra hemverê hêrişanê çeteyan de xo pawenê û hetêna ra zî cuya xo ya rojaneye domnenê. Nê mabênî de bale ante ke vizêr Hêzê Koalîsyonî yê ke serkêşîya Amerîka de yê vejîyayî dewrîye. Wesayîtê zirxinî yê Amerîka merkezê Minbicî de vejîyayî dewrîye.
Dewleta Tirkî ya ke hîrê serranê peyênan de Amerîka ra vana "Sûrîye ra vejî" û dimayê qerarê "ancîyayîşî" zî na rey vana "mevejîyê, ma pîya bixebetîyê" nika wazena ke pozîsyonê xo bewlî bikero. Heyetêka Tirkan do meşte seba pêvînayîşan şiro Rûsya.
TEWRE DE IDLÎB ESTO?
Heyeto ke do tede wezîrê Karê teberî yo Tirk Mevlut Çavuşoglu, wezîrê Pawitişî yo Tirk Hulusî Akar, musteşarê MÎTî Hakan Fîdan û vervatoxê Erdoganî Îbrahîm Kalin ca bigîrê nêno zanayene ke do na rey çi wadan bidê Rûsya. Yeno vatene ke do tewreyê Tirkîye de na rey Idlîb bibo.
Hetê bînî ra dimayê qerarê "ancîyayîşî" û "fekveradayîşê fuzeyanê S-400an de dayîşê fuzeyanê Patrîotan bi Tirkîye" heyetêkê Tirkî do 8ê Çile de Washington de pêvînayîşan virazo.
