Sakîne Cansiza ke 9ê çeleyê 2013î de pa Leyla Şaylemez û Fîdane Dogan Paris de ameybî qetilkerdene, hema zî rêçê ci Rojawanê Kurdîstanî de gandar ê.

Salîm Omer 1977 ra heta Şorişê Rojawanî Şamî de mend. Ey 1980 de PKK şinasna. Milîtanê PKKyî yê ke Vakurî ra derbazê Rojawanî bîyê Şam de nameyê înan eşnawîyayêne. Salîm Omerî nameyê Sakîne Cansiz  serra 1983yî de bi fotografêkê kovare de eşnawit. Omerî ANFyî rê qala Sakîne Cansiz (Sara) kerde.

Salîm Omerî dîyar kerd ke 1982-1983 de kovarêke ameyêne Rojawanî û vat: ''Mi kovare de fotografê embaze Sara dî. Mi nêzanayêne ke a kam a la fotografî zaf bala mi ante. Fotograf de di kesî est bîyî. Mi embazan ra pers kerd ke gelo a cinîye kam a. Înan vat ke a ronayoxanê PKKyî ra Sakîne Cansiz a. Bi Sakîne Cansiz ez musaya ke mîyanê partîye de cinîyî zî est ê. Embaze Sakîne hem cinîyêke hem zî serkêşêke bîye. Bi taybetî wexto ke mi xoverdayîşê aye yê Zîndanê Dîyarbekîrî eşnawit kesayetê aye hîna zaf tesîrê mi kerd.

1992 de ez şîya Warê Rayberîye. Mi uca de embaze Sakîne dîye. A sey ê fotografê kovare heybetîne bîye. Ez şîya hetê aye mi waşt ke ma pîya yew fotografê xo bigêrê. Embaze Sara kêfweş bîye û ma pîya fotografê xo girewt. O fotograf hema zî mi de yo. Coşê şarî, estbîyayîşê girseyan ê warî kêfê embaze Sara ardêne. Kamî nameyê aye eşnawitêne waştêne aye bivîno. O çax cinîyêka hende xoverdayoxe nêamebî dîyene. Her kesî qala ci kerdêne ke aye senî vera îşkenceyanê dewleta tirke xo ver dayo. 

Xoverdayîşê embaze Sara derbazê tarîxî bi, bi destan. A sey sembolêke mîyanê komelî de yena qebulkerdene. A embaza Rayber Apoyî bîye. Ma zî do heta peynî şagîrtê embaze Sara bibê.''