Fermandarîya Qerargehê Merkezê YJA Starî eşkera kerd ke fermandaranê înan ra Jiyan Herdem şehîde bîya û nê vatî:

''Hemraya ma, mîlîtana cinîya serkêşe, şorişgêra erjîyayî, cinîya esîle ya şarê Mêrdînî, fermandaranê YJA Starî ra  Jiyane Herdem 30ê teşrîna peyêne ya 2023yî de Herêmanê Pawitişî yê Medya de serê wezîfeyê de hêrişê dişmenî de şehîde bîye.

Hemraya ma Jiyane Herdema ke eynî wextî de serkêşanê PAJKî ra bî ma serrgêra şehadetê ci de bi rêzdarî, heskerdiş û menetî yad kenê. Ma şexsê hemraya xo Jiyane de heme şehîdanê xo bi rêzdarî yad kenê û soz danê ke ma do waştişanê înan bîyarê ca. Ma sey hemrayanê ci sere de keyeyê hemraya xo Jiyane Herdem rê heme şarê xo yê welatperwerî rê serweşîye wazenê.

Nasnameyê hemraya ma Jiyane Herdem wina yo:

Hemraya ma Jiyane bi kulturê welatperwerîye bena pîle û 1992yî de tewrê refanê têkoşînê azadîye bena.Hemraya ma Jiyane tecrubeyanê xo yê şer, cuyeya gerîlayan, fermandarîye û serkêşîye mîyanê şerê germinî yê Botanî de kena pêser. Warê şerê giranî de sey cinîya şorişgêre têkoşînê xurtî dana û xo hêzdar kena. Hemraya ma Jiyana ke Botanî ra şina warê Rayberîye, Rayber Apoyî ra perwerde gena û felsefeya ey nêzdî ra musena û cuyeya xo ya şorişgêre ya 31 serran de bi na felsefe cuwîyena û dana cuwîyayene. Hemraya ma Jiyane xeylê xebatanê muhîman da ca gena û pêardişê sîstemê KCKyî keda pîle dana.

Wa şarê ma yo welatperwer û cinîyê xoverdayoxî bizanê ke ma do şexsê hemraya xo Jiyane de têkoşînî xurtêr bikerê û waştişê şehîdanê xo bîyarê ca.  Ganî heme ciwan û cinîyê ciwanî wayîrê mîrasê têkoşînî yê hemraya ma Jiyane bivejîyê. Na çarçewa de ma reyna şexsê hemraya xo Jiyane de heme şehîdanê Şorişê Azadîye yê Kurdîstanî bi mînetî yad kenê û sozê serkewtişî newe kenê.''