Fermandaranê QSDyî ra Çîya Firatî derheqê hêrişanê îşxalî yê dewleta tirke de ANFyî rê qisey kerd.

Çîya Firatî ard ziwan ke şero esas ê dewleta tirke vera sivîlan o û Serêkanîyê, Girê Sipî û Efrîn de xeylêk sivîlî hêrişê dewleta tirke de şehîd bîyî. Firatî vat: ''Til Temir, Zirgan û Eyn Îsa de mengêke de 6 sivîlî şehîd bîyî ke nînan ra 4 tenî doman bîyî. Dewleta tirke dişmenê şarê ma ya û wazena şarê ma ecîz bikera, bêpawitiş verda.

Ma tecrubeyanê Girê Sipî û Serêkanîyê ra ders vet. Eke hêzê mîyanneteweyîyê ke ma pîya vera DAÎŞî şer kerd Tirkîya vindarnê û sînoranê ma bipawê no çîyoo weş beno. La ma pê fermandar, şerwanan û hêzê xo bawer ê. Hêzêkê ma yo fedakar, çêr û wayîrtecrube esto ke eşkeno şaranê xo bipawo. Amadekarîyê ma zî wina yê. Şerwanê ma çarçewa erkê xopawitişî de têgêrenê û şaranê ma pawenê.''

Çîyayî bale ante xopawitişê şaranê Rojawanî ser û vat: ''Cayê ke QSD tira vejîyayo şar zî tede nêmendo, ameyo koçkerdene, raştê zulmî ameyo. Coka ma vanê şerê Tirkîya a raşte vera şarê ma yo. Şarê ma bi rolê xo têgêreno. Rolê şarê ma têna şuxilnayîşê çeke nîyo xora no zî muhîm o la bi seyan metodê têkoşînî estê. Nê hetî ra bawerîya ma bi şarê ma esta. Şerwanê ma hînî zanenê ke vera teknîkê îşxalkeran xo bipawê. Hetê tecrubeyî ra şerwanê ma zengîn ê.''

Çîyayî derheqê hêrişanê hewayî yê Tirkîya de wina qisey kerd: ''Warê hewayî Tirkîya rê do bêro qefilnayene yan nê ez nêzanena. Hêrişê Tirkîya hêz û moralî danê DAÎŞî. Akerdişê warê hewayî Tirkîya rê yeno manaya qebulkerdişê hêrişan û qirkerdişan. Ma reyna vanê eke warê hewayî bêro qefilnayene ma zî do şerê pawitişî bikerê ma eşkenê şarê xo bipawê. Şarê ma hînî dişmenê xo hol şinasneno. Tirkîya heta nika ser nêkewte û do ser nêkewa. Ma bi hezaran şehîdî dayî û ma pê bawer ê ke rûmetê şarê xo bipawê û rayîr medê îşxalî.''