Berpirsîyarê Çapemenîye yê QSDyî Ferhat Şamî derheqê hêrişê DAÎŞî yê vera zîndanê Hesekê û bêxemîya hêzanê mîyanneteweyî de ANFyî rê qisey kerd.

DAÎŞî binkewtişê Baxozî ra nata reya verêne cehd kerd ke wina hêrişêko pîl bikero. Qey nê prosesî de wina hêrişêk kerd?

No hêrişêko normal nîyo. Na rewşêka girane û bitehluke ya. Serbûtêko stratejîk o. DAÎŞ wazeno xo newe ra ganî bikero. No hêriş hem hetê DAÎŞÎ ra hem zî hetê  tay hêzanê ke wazenê DAÎŞî ganî bikerê ra ame kerdene. Coka ma rewşe zaf muhîme genê dest û hîsgêr ci rê nizdî benê. Ma tim no tehluke ard ziwan. Beno ke hêrişê înan dewam bikerê. No semedê Rojawan, Sûrîye, Iraq û heme dinya tehluke yo.

DAÎŞ eşkeno agêro prosesê 2014î? Rewşa winayênî de perpirsîyarîya hêzanê mîyanneteweyî çîya?

DAÎŞ eşkeno na rewşe ra feyde bikero agêro prosesê 2014î. No îhtîmalo dûrî nîyo. Berpirsîyarê na rewşe xora hêzê mîyanneteweyî yê. Xeylêk welatê Ewropa dosyaya DAÎŞî sey dosyayêka asayîşî genê dest la têna asayîş nê hetê ci yo qanûnî zî esto. Heta ke problemê DAÎŞî hetê qanûnî ra mero çaresererdene, problemê asasyîşî do tim bibê. Dewletî û hêzê ke paştî danê DAÎŞî ke sereyê înan de Tirkîya esta, heta ke ê nêrê muhakemekerdene  problem çareser nêbeno. Peyê înan de îstîhbarat, hêzê leşkerî û dewletî estê. Ganî no hole bêro famkerdene. Dosyaya DAÎŞî dosyayêka pêroyîya. Qet yew welat têna nêeşkeno çareser bikero.  DAÎŞ çarçewaya rêxistinkerdişê pêroyî de semedê hedefêkî ame ronayene. DAÎŞ têna Ebubekîr Bagdadî û çend çeteyan ra nîno raameye. Ma ewro reyna dî ke nê tepişteyî semedê heme dinya tehluke yê.

Koalîsyonê mîyanneteweyî nê hêrişan de paştî dayê hêzanê şima?

Hêzê koalîsyonî hewayî ra paştî danê la no qîm nêkeno. Verî ganî çimeyê DAÎŞî bêrê ziwakerdene. DAÎŞ hêz û paştîdayîşê xo ça ra geno, kam paştî dano ci ganî bêro tesbîtkerdene û hetkarê ci bêrê cezakerdene. Yew zî ganî hêvîya serbetveradayîşî ya çeteyan çînebo. Çunke înan sûcî kerdî û ganî mehkemeyanê mîyanneteweyî de bêrê muhakemekerdene û no muhakemekerdiş ganî herêma ma de bêro kerdene. DAÎŞî tîya qirkerdiş kerd, merdimî sarebirnayî. Merdimanê ke DAÎŞî ra zirar dîyo ganî semedê înan edalet bêro caardene. Tay hêzî sey problemê wirdîyî nizdî benê. No zî îmkanê ganîbîyayîşî dano çeteyan. DAÎŞ di rojî yo medyaya sanale ser o propoganda keno. Hinî ramojneno ke ti vanê qey heme Hesekê girewto. Çew vanê qey zîndan destê înan de yo. Na propaganda do reyna belayo pîl bîyaro welatanê Ewropa ser. Ucayan ra do bi hezaran kesî bêrê tewrê çeteyan bibê. Beno ke Ewropa hucreyê DAÎŞî bêro ronayene. Ganî dewletê mîyanneteweyî problemê DAîŞî raşt biercnê. Wa têna sey problemê Rojawan, Sûrîye û Iraqî megêrê dest. No problemê heme dinya yo.

Tewr zaf dewleta tirke paştî dana DAÎŞî. Paştdayîşê Tirkîya çend hêz dano DAÎŞÎ?

Tay welatî paştî danê DAÎŞî la Tirkîya têna paştî nêdana, DAÎŞî îdare kena.  Na propaganda nîya, belgeyê naye estê.  DAÎŞ çend serrî sînorê dewlet tirke de ciwîya. Heta dewleta tirke înan rê bêrê xo akerdî. Berê Girê Sipî de mabênê dewleta tirke û DAÎŞî de petrol ameyêne rotene. DAÎŞî sey fermî dewleta tirke reyde bazirganîye kerdêne. Emîrê DAÎŞî Tirkîya de bî. Nika zî ermîrê DAÎŞî ke Bahozî ra vejîyayî Girê Sipî û Serêkanîyê ke dewleta tirke îşxal kerdî de ciwîyenê. Coka ma vanê dewleta tirke DAÎŞî îdare kena. Plananê îşxalkerdişê herêmanê Rojawanî ra yew zî no bi. Wextê hêrişan manîdar o. Serrgêra îşxalî Efrînî de bi. Dewlet tirke û DAÎŞ pîya wazenê Rojawan de îstîkrarî bixeripnê. Coka dewleta tirke ge eşkera ge ge zî bi destê çeteyan hêriş kena. Xora heme dewletê mîyanneteweyî naye vînenî û zanê. Ma do badê nê hêrişî îspat bikerê ke engişta dewleta tirke tede esta.

DAÎŞ bitaybetî Rojawan de vejîya werte. Şima nê senî ercnenî? Herêmanê bînan de zî esto?

DAÎŞ têna Rojawan de nîyo. Eslê xo de DAÎŞ herêmanê bînan de dahîna bihêz o. Se ra 60 çolanê Sûrîye de têgêrayîşê DAÎŞî esto. Bitaybetî çolanê Dêra Zorî, Reqa, Hema, Şam, Himis, Siwêda û heta çolanê Iraqî. Warê çolan binê kontrolê çeteyan de yê. Rûsya û hukmatê Şamî nêeşkenê înan kontrol bikerê. DAÎŞ tîya hem çalakî keno, hem xo rêxistine keno heta şewe nê cayî bitemamî destê ci de yê. Nê demê peyênî de herême de zaf hêrişî bîyî. DAÎŞî tîya ra dîmenî vila kerdî. Çeteyî kenê ke bajarê Eresafê yo ke binê kontrolê hukmatê Şamî de yo bifînê dest uca ra korîdor abikerê û xo biresnê Rojawanî. Hukmatê Şam, Rûsya û Iraq bê koordîne xebiteyenê. No zî verê çeteyan akeno. Ganî xebatê koordînekerdeyî yê stratejîkî bêrê kerdene ke verê tehluleyê DAÎŞî bêro girewtene.