Dewleta tirke ya îşxakere 23-25ê kanûne de hêrişê 5 dibistananê Kantonê Cizîre yê Rojawanî kerdbî. Hêrişan de 28ê kanûna 2023yî de Kantonanê Cizîre, Firat, Efrîn û Şehba de 712 dibistanan mabên dabî perwerdeyî. 

Komîteya Perwerdeyî ya Qamişloyî ra Hesîna Elî ard ziwan ke dewleta îşxalkere bêmabên hêriş kena û vat: ''3 serre ra heta 16-17 serre wendekarê ma est ê. Hêrişî bi hawayêkê xirabî tesîrê domanan kenê, domanî tersenê.Keyeyî zî qerqilîyenê. Coka ma neçare manenê ke mabên bidê perwerdeyî. Menga kanûne de 100 hezar wendekarî cara perwerdeyî ra bêpar mendbî.''

Bêrîtane Qadir Elîya ke şina sinifa 12ine ya Dibistana Şehîd Şervanî ya Qamişloyî vat: ''Wextê nê roportajî de zî deweta tirke ha hêriş kena, vengê bombayan yenê. Nê hêrişan ra perwerdeyê ma vindert. Dewleta tirke hêrişê dibistanan kena. Ez ewro pê vengê bombayan hişyar bîya. Ma cuyêka arame wazenê. Nêwazenê ke tim mabên bidê perwerdeyî.''

Azirîne Îbrahîm Ramadana 12 serre Dibistana Şehîd Şervanî ya Qamişloyî de şina sinifa 7ine. Azirîne vat: ''Hêrişanê dewleta tirke ra ma neçare manenê ke mabên bidê dibistane. Sîstemê ma yê perwerdeyî serûbin beno. Seba ke ma dersan ra erey manenê, dersê ma pêser benê. Mamostayê ma zî zaf zehmetîyan ancenê. Dewleta tirke hêrişê dibistanan kena, hêrişê ma kena. Ma zaf tersenê.''

Rojawanê Kurdîstanî de 41 hezar û 867 mamostayî, 890 hezar û 860 wendekarî est ê. Hînî hêrişan ra 155 dibistanî nêşuxilîyenê, 216 dibistanî zî nêm bi nêmî şuxilîyenê. Rojawan de bi temamî 4 hezar û 160 dibistanî est ê.