23 şerwanê ke Hemleya Gurzê Şaran de şehîd bîyî Şehîdgehê Şehîd Dijwarî yê dewa Dawudîyê ya Hesekê de bi merasîmêkê biheybetî  ameyî definkerdene.

Cenazayê şehîdanê ke Meclîsê Keyeyanê Şehîdan ra ameyî girewtene sey konvoyî ameyî berdene şehîdgehî. Şehîdgeh de badê rêzgirewtişî Hemserekê Meclîsê Rayberdişî yê Îdareyê Xoserî Ebîd Hamîd El Mihbaşî qisey kerd. El Mihbaşî bale ante fedakarîya şehîdan ser û vat: ''Dişmenê Îdareyê Xoserî hinî zanê ke qehremanê ma yê ke mergî ra nêtersenê estê. Zerrîya ma dejena la ma pê şehîdanê xo sereberz ê.''

Endama Heyetê Komîteya Hemserekîye PYDyî Foza Yusifa ke merasîm de qisey kerd ard ziwan ke ê semedê 121 şehîdanê ke semedê şarê Rojawanî ganê xo feda kerd dejê giranî ancenê û vat: ''Şehîdanê ma pê qehremanî planê pîlî yê îşxalkeran pûç kerdî û cewab da înanê ke wazenê DAÎŞî newe ra ganî bikerê. QSD û HPCyî heme planê dişmenî pûç kerdî.''

Fermandaranê Meclîsê Leşkerî yê Hesekê ra Îdrîs Selmoyî bale ante plananê dewleta tirke yê vera Rojawanî ser û vat: ''Hêzanê ma Hemleya Gurzê Şaran de semedê merdimîye têkoşînêko pîl da û heme plananê DAÎŞî serûbin kerdî. Erdogano ke badê binkewtişê DAÎŞî bêçare mend pê teyarayanê şerî hêrişê şarê ma kerd. Ê se kenê wa bikerê do meeşkê îradeyê nê şarî bişiknê.''

Endama Meclîsê Keyeyanê Şehîdan belgehê şehîdan ê Muhened Hesen Silêman, Ednan Ewda El-Ubeyd, Mihemed El-Ebid, Ehmed Hiwêdî El-Tewîl, Xelîl Mihemed Şêxo, Şukrî Wadî Doman, Ebdulraûf Îd El-Selîm, Elî Hisên El-Elî, Ehmed Casim El-Elî, Îmad Salih, Rêşad Ehmed Yûnis, Feysel Ebdurehman, Ednan Ebas Xilêf, Egîd Mihemed Xelîl, Ehmed Xazî Nasir, Ehmed Salih Silêman, Mihemed Fîras Dexîl, Samî Îbrahîm Yûsif, Ebdullah Xelîl El-Îfên, Xalid Ilêwî, Zehredîn Hesen Ebdo, Cuma Şêxo Beyrem û Ehmed Ayîd Salihî wendî û teslîmê keyeyanê înan kerdî. Badê merasîmî şehîdî bi sloganan ameyî definkerdene.