Fermandaranê YPJyî ra Zinarîne Qamişlo derheqê hêrişanê Tirkîya, rewşa Afganîstan û Rojawanî de ANFyî rê qisey kerd.

Zinarîne Qamişlo pare kerd ke şer têna vera gerîlayan nê vera pêro Kurdîstanî û kurdan o. Zinarîne vat: ''Pê tecrîdkerdişê Rayber Apoyî no konsept dîya destpêkerdene. Armancê konseptî teslîmgirewtişê kurdan o. Ê wazenê sîstemê demokratîkî yê kurdan, îdareyê xoserî yê Rojawanî werte ra wedarnê. Bi nê hawayî hêzê hegemonî şaranê bînan rê zî mesaj danê ke ê do nêverdê çew bir aramî biciwîyo. 

Ma biewnê ci dima ke Afganîstan kewt destê Talîbanî hêrişê dewleta tirke yê vera Şingalî zêdîyayî. Xora cara warê hewayî yê Başûrî Tirkîya rê akerde bi. Şingal de nêweşxane ame pirodayene. No hêriş îsbat keno ke fermanê vera êzidîyan dewam keno. Heta ke Tirkîya estba DAÎŞ zî esto. Reyna Talîbanî ra dima hêrişê Tirkîya yê vera Rojawanî zî zêdîyayî. Hêzanê hegemonan bi nê hawayî mojna ke Rojhelatê Mîyanênî de ancî sîyasetê serê mergî bikerê.

Rixmê peymanan zî vera Rojawanî hêrişî yenê kerdene. Amerîka û Rûsya rixmê wezîfeyê xo yê garantorîye zî vera hêrişan çîyêk nêkenê. Xora vera îşxalî xoverdayîşê ma dewam keno. Ma çarçewa xopawitişê meşrûyî de amadekarîya xo kenê. Îdîaya ma pîl a. Ma do erdê xo vera îşxalê Tirkîya bipawê. Ganî vera nê hêrişan şar wayîrê yew tewir bibo û yewîya xo bîyaro ca. Merasîmê embaze Sosine, embaz Rênas û ê embazanê bînan vera hêrişanê îşxalî cewabêk bi. No wayîrvejîyayîş, rêxistinîya cinîyan û hêrsê şaran ê vera îşxalkeran do qetî kêm nêbê.''