Fermandarîya Pêroyî ya Asayîşê Zereyî yê Rojawanî îlan kerd ke înan seba ke Kampa Holî tehlukeyê DAÎŞî ra bixelisîya safhaya diyîne ya 'Operasyonê Asayîş û Merdimîye' daya destpêkerdene.

Eşkerayîya Fermandarîye hetê endamanê Fermandarîya Pêroyîye Elî Hesen û Vejîne Êlan ra ameye kerdene. Vervatoxê YPGyî Nurî Mehmud, Vervatoxê QSDyî Aram Hena û fermandarê QSDyî zî tewrê eşkerayîye bîyî.

Fermandarîya Pêroyî ya Asayîşê Zereyî da zanayene ke Kampa Holî de bi giranî keye û hucreyê DAÎŞî manenê, coka vurîyaya merkezê DAÎŞî. Fermandarîye dîyar kerd ke kampe de 46 hêrişê terorîstî ameyê kerdene, 14ê cinîyî 44 kesî nê hêrişan de kişîyayê. 

Eşkerayîya Fermandarîya Pêroyîye bi kilmî wina ya:

''Kampa Holî vurîyaya bîya merkezê DAÎŞî. Kampe de vera roniştoxan, zerrîwazanê dezgehanê hetkarîye û endamanê Asayîşê Zereyî metodê wehşîyî yenê caardene. Hetê bînî ra xîretê remayîşî, hêrişê plankerdeyî yê vera kampe hetê hêzanê ma ra ameyî pûçkerdene. Hêrişê cerganê DAÎŞî yê vera Zîndanê Sînaa zî nê hêrişanê plankerdeyan ra yew o. Nê hêrişî de û hêrişanê bînan de cergan kerd ke zere û teberî ra hêrişan bikerê, înan dêsanê asayîşî ra ver bi sînorê Iraq, Tirkîya û Sûrîye tunelî akerdî. QSDyî û hêzanê ma zafê cergî tepiştî û planê înan ê tehlukeyînî pûç kerdî. Emser kampe de 46 hêrişê terorîstî ameyî kerdene, 14ê cinîyî 44 kesî nê hêrişan de kişîyayî. Nê hêrişî bi kardî, tifing û çeke ameyî kerdene. Reyna kampe de 13 xîretê remnayîşî û vêşnayîşî qewimîyayî. Cenazayê merdiman erzîyayî kanalîzasyonan.

Hêrişê kampe hêrişanê Tirkîya yê vera Rojawanî reyde zêdîyayî. Zafê sercergê DAÎŞî herêmanê binê îşxalê Tirkîya de ameyî dîyene ke nê sercergî Kampa Holê û herêmanê dormeyî de çalakîyanê terorî serûber kenê. Belge û îtîrafê cergan mojnenê ke Tirkîya hetkarîya îstîxbarat, asayîş û ekonomî dana cerganê DAÎŞî û wazena bi rayîrê nê cergan aramîya herême biherimna. Hêzanê ma rixmê şertanê zoran zî heta nija hucreyê cergan pê operasyonan destbend kerdî û tepiştî.

Rewşa peyêne û tehlukeyê vera kampe giran û pîl ê. Komelo mîyanneteweyîyo ke têkilîya cergan û Tirkîya peygoş keno, mesuldarê nê rewşe û tehlukeyan o.

Ma sey Hêzanê Asayîşê Zereyî bi destekê Hêzanê Sûrîyeya Demokratîke (QSD) û Koalîsyonê Mîyanneteweyî yê vera DAÎŞî îlan kenê ke seba ke Kampa Holê de cerganê DAÎŞî tesbît bikerê, çimeyanê înan ziwa bikerê û kampe terorî ra bixelisnê safhaya diyîne ya Operasyonê Asayîşî û Merdimîye danê destpêkerdene.

No operasyon hêriş û gefanê Tirkîya ra semed amebi taloqkerdene. La eke ma nika tênêgêrê pêro dinya û herême raştê mesele bêrê. Coka ma venga pêro dewletan danê ke paştî bidê operasyonê ma. Ma reyna anê ziwan ke ma nê operasyonî de goreyê heqanê merdiman û qanûnan têbigêrê.''