Fermandarîya Pêroyî ya Hêzanê Asayîşê Zereyî ya Rojawanî 25ê tebaxa 2022yî de bi beşdarîya QSD, YPG û YPJyî safhaya diyîne ya Operasyonê Asayîşî û Merdimîye dabî destpêkerdene. Roja diyîne ya operasyonî de tewr tay 27 cergê DAÎŞî tepişîyayî, 4 tunel û wargehê cergan ameyî îmhakerdene. Operasyon de xeymê ke hetê hucreyanê DAÎŞî ra seba perwerde, mehkeme, îşkencexane û înfazî şuxilîyayêne zî hetê asayîşî ra ameyî îmhakerdene.

Îdarekaranê Kampa Holê ra Cîhan Henanî derheqê operasyonî de qisey kerd û vat: ''Operasyonê Asayîşî û Merdimîye 2 rojî xo pey de verdayî. Îdareyê kampe zî wazeno ke operasyono winasên biameyêne kerdene. Çunke kampe de serebûtê kiştişî zêdîyabî. Operasyon heta nika bi serkewtişî dewam keno.''

Henanî da zanayene ke xeymê vengî yê kampe seba kerdişanê cergan şuxilîyenê û vat: ''Kampe de nêzdîyê hezar xeymî est ê. 2019 de xelisnayîşê Baxozî ra dima kampe de keyeyê DAÎŞî ameyî cakerdene û rewşe têmîyan bîye. Cerganê DAÎŞî nê xeymî seba kerdişanê terorî şuxilnayêne. Rîyê nînan ra îdarekarê kampe nêeşkayêne debikewê kampe. Hêzanê asayîşî nê cayî tesbît kerdî û wedaritî. Dima ke nê xeymî wedarîyayî kampe seba dezgehanê sivîl û hetkarîye bîye asayî.''