Heyetê Îdareyanê Cayîyan ê DEM Partî bi şîarê ''Vateyê ma nêqedîya: Ma do  pîya şîdetî vindarnê'' kampanya daye destpêkerdene ke do serrêke dewam bikera. Deklerasyonê kampanya Konaxê Cemil Paşayî yê Amedî de bi eşkerayîyêka çapemenîye ame eşkerakerdene. Pîya bi hemşaredar û mudiran ê cinîyan ê DEM Partî xeylêk kesî tewrê kombîyayîşî bîyî.

Metnê eşkerayîye yo kurdkî hetê Hemşaredara Bajarê Pîlî yê Mêrdînî Devrîme Demir  û tirkî zî hetê Hemşaredara Êlihî Gulîstane Sonuk ra ame wendene.

Eşkerayîye de bale ameye antene serê têkoşînê cinîyan ê seyyewbînîye û azadîye  yê bi seserran ser û nê ameyî vatene: ''Rejîmo kolonyalîsto ke îqtîdarê camêrdê serdestî wazeno serê îrade, kede û bedenê cinîyan de rono, komel de sey qirkerdişê vera cinîyan vejîyeno werte. Ewro şîdeto nêrî têna vera cinîyan ney vera domanan zî yeno kerdene. Qetilkerdişê Narîne û mergo şikdar ê Rojîne sey çîyêkê normalî yenê ramojnayene. La no çîyêko normal nîyo, netîceya xirabîya birêxistine ya îqtîdarî ya. Her roje na herre de cinî û domanî bi hewayêkê birêxistine yenê qetilkerdene. Sere de cinîyî yeno waştene ke  komel bêro tecrîdkerdene.

Bitaybetî 8 serranê peyênan de bi darbeya qeyûmî destkewteyê cinîyan ê îdareyê cayîyî yenê hedefgirewtene, komeleyê cinîyan û aktîvîstê ci yenê krîmînalîzekerdene. Bi nê kerdişan hêrişê camêrdan xorîyêr beno. Ma sey cinîyan zanê ke vera şîdetî ganî têkoşîno xurt bêro kerdene. Coka şaredarîyanê ma de vera şîdetî û semedê pawitişê heqanê cinîyan xebatê muhîmî yenê kerdene.  Îdareyê cayîyî îdareyê merkezî ra zafêr  xebatanê bitesîran kenê.

Bi nê perspektifî ma emser 25ê Teşrîna Peyêne Roja Têkoşînê Vera Şîdetê Serê Cinîyan a Dinya de sey şaredarîyanê DEM Partî kampanyayêke danê destpêkerdene. Kampanyaya ma do serrêke dewam bikero. Bi na kampanya do vera zextê nêrî yo ke na herre de nasname, îrade û xoverdayîşê cinîyan nêvînayîşî ra yeno, xoverdayîşê cinîyan bêro ramojnayene. Ma do vera polîtîkayanê nêrî vengê xo berz bikerê û vera şîdetê serê cinîyan têkoşînî xurtêr bikerê. Wa rejîmê qeyûmî bizano ke cinîyî do çirey xoverdayîşê xo cameverdê. Ma veng danê her kesî ke wa vera sîstemê nêrî vajo Jin, Jiyan Azadî.''