Gerîlaya HPGyî Melsa Dêrik warê Cîloyê Biçûkî yê herêma Zapî de 31ê gulana 2021î de şerê giranî yê vera artêşa tirke de şehîd bîye. Babî û dadîya Melsa Dêrik ANFyî rê qisey kerd. 

Dadîya Melsa Dêrik Şerîfe Qasim vat: ''Kênaya mi tewra cepheyê şorişî bîye û şehîd bîye. Şehadetê kênaya mi Rayber Apoyî rê, gerîlayanê azadîye rê fîraz bo. Ez pêro gerîlayanê azadîye selam kena. Vera dişmenî xoverdayîşêko bêhempa yeno kerdene. Roje roja bermayîşî nîya, roje roja pîlkerdişê têkoşînî ya. Şarê Kurdîstanî pêro ganî vera îşxalî wurzo payan ser û tewrê têkoşînî bibo.''

Babîyê Melsa Yûsif Îsmaîl Elîyî vat: ''Melsa 2011 de tewra gerîlayan bîye û koyanê azadan ê Kurdîstanî de şehîd bîye. Hêvîdar a ke şehadetê ci do yewîya şarê kurdî bîyaro ca. Ez venga Mesûd Barzanîyî dana ke gerîlayî zî domanê ma yê. Eke domanê ma şehîd benê wa şerê vera dişmenî de şehîd bê. Wa vera ê kesanê ke gonîya ma wenê têkoşîn bikerê û nê rayîrî de şehîd bibê. Wa domanê ma şerê birakûjî de şehîd mebê.''