Dewleta tirke hewteyê peyênî de merkezê Kobanê û dewê ci dayî bombayan ver. Netîceya bombardumanî de dewa Xanê de Îbrahîm Şerif (80) şehid bi, 12 kesî birîndar bîyî û xeylêk keye û erazîyan zirar dî. Dewijanê Cirîn û Serzûrî ke vera hêrişan hêrsê xo ard ziwan ANFyî rê qisey kerd.

Zozane Xelîla ke meclîsê Cirînî de xebitiyena vat: ''Dewleta tirke tim timûtim cayanê sîvîlan bombarduman kena. Bitaybetî gama ke sixletî esta hêriş kenê. Gama ke şar karî ser o, bexçeyanê xo de yo hêriş kenê. Netîceya hêrişan ke dewijî yenê kiştene û birîndarkerdene. Domanî wirdîyî ameyî pirodayene. Waştişê înan pede pede îşxalkerdişê Rojawanî yo. Heme şarê Rojawanî yenê hedefgirewtene.''

Dewijê Cirinî Ehmed Hecî Dewrêş Îsayî zî ard ziwan ke hêrişî nêvindenê û vat: ''Eke waştişê înan ma kiştiş o ma mergî rê amadeyê la ma do bananê xo ra mevejîyê.''

Endamê Meclîsê Girê Sipî Xelîl Qewazî bale ante hêrişê dewleta tirke yê vera sîvîlan ser û vat: ''Kobanê ra heta dewanê Girê Sipîyî hêriş kenê. Qirkerdiş yeno kerdene la qet welatêk vera naye nêvejîyeno.''

Xelîl Îsmaîlo ke hêriş de banê ci derbî girewtî ê zî wina vat: ''Dewleta tirke hêrişê dewa ma kerd.  Banê mi rijîya. Banê apê mi zî rijîya. Hêgayê mi yê xeleyî zirar dî. Wazenê ma dewanê ma ra vejê. Ganî ma sera şirê? Ge ge wexto ke hêrişî giran benê ma bananê xo ra vejîyenê la dima agêrene.''