Xeylêk wextî ra nata vera Eyn Îsayî bi çekanê giranan hêrişî yenê kerdene û sivîlî qestî ra yenê hedefkerdene. Nê hêrişanê dewleta tirke de domanî zî tede sivîlî merdî û xeylêk kesî birîndar bîyî.

Rixmê peymana ke Tirkîya Amerîka û Rûsya reyde kerde, dewleta tirke heta 2 kîlometre nêzdîyê Eyn Îsayî bîye û dûştê şaristanî de noqtayê leşkerî û hacetê termalî ronayî.

Rejîmê Şamî û Rûsya vera hêrişanê artêşa tirke ya îşxalkere bêveng ê.

Fermandaranê YPJyî ra Barîn Kobanê derheqê hêrişanê vera Eyn Îsayî de qisey kerd û vat: ''Eyn Îsa de bi hezaran sivîlî ciwîyenê. Xeylêk keyeyan de texrîbê madîyî estê, xeylêk sivîlî birîndar bîyî û merdî. La reyna zî şarê Eyn Îsayî girêdayîyê erdê xo yo û vano ê do heta peyên Eyn Îsa de bimanê. Şarê Eyn Îsayî do qet erdê xo war nêverdê. Şar pê bêvengîya Rûsya û rejîmê Şamî qayîl nîyo. Hêrişanê peyênan ra dima şarî vat 'eke hewce bibo ma do pêro pawitişê xo yê meşrûyî kenê, erdê xo pawenê.''

Barîne Kobanê ard ziwan ke ê do cewabê hêrişan bidê û vat: ''Ma do sey YPJyî vera nê hêrişan bêcewab nêmanê. Eke ê hêriş bikerê ma zî do hêrişê înan bikerê. Bêvengîya NATOyî zî mojnena ke mabênê înan û dewleta tirke de îtîfaqêk esto. Ma domanê nê şarî yê, şerwanê ci yê. Eke ma cewabê hêrişan nêdê tarîx do ma efû nêkero. Ma deyndarê şarê xo yê. No erd erdê ma yo û ma do wayîrê ci vejîyê. Eke hewce bibo ma de ancî bedelanê giranan bidê. Şaro bindest kamca de bibo ma do uca de bibê.''