Kobanê û Qamişlo de serrgêra 38. ya Hemleya 15ê Tebaxe bi şîarê û 'Bi ruhê 15ê Tebaxe bêrê cengê azadîye' bi şayîyan ameye fîrazkerdene.

Kobanê de şarî hem bi wesîleya 15ê Tebaxe hem zî bi wesîleya serrgêra 6. ya azadkerdişê Minbicî şayîyêke viraşte. Temsîlkarê Îdareyê Xoserî, dezgeh, partî û xeylêk hemwelatîyî tewrê şayîye bîyî. Şayîye de Têgêrayîşê Ciwananê Şorişgêran ra Xunave Xelîl qisey kerd û pare kerd ke Şorişê Rojawanî bingeyê xo Hemleya 15ê Tebaxe ra girewto. Nameyê Kongreya Starî ser o zî Feleke Yûsif îfade kerd ke xêrê 15ê Tebaxe ra kurdî ewro eşkenê bi azadî serê erdê xo de biciwîyê.

Şayîye de hunermendî vejîyayî sehne ser, deyîrî ameyî vatene û govende ameye girewtene.

Qamişlo de serkêşîya Têgêrayîşê Ciwananê Şorişgêran û TEV-ÇANDî de şayîyêke ameye kerdene. Temsîlkarê Îdareyê Xoserî, dezgeh, partî û xeylêk hemwelatîyî tewrê şayîye bîyî. Warê şayîye bi fotografanê Rayberê Şarê Kurdî, bi alayanê Kongreya Star, TEV-DEM, YPG-YPJ û QSDyî xemilîya. Şayîye de Endamê PYDyî yê Qamişloyî Sabir Mihemedî qisey kerd û îfade kerd ke 15ê Tebaxe têna kurdan rê ney pêro şaran rê bi hêvî. Dima nameyê Yewîya Cinîyan ê Ciwanan a Qamişloyî ser o Rîme Dede qisey kerd û vat: ''Hemleya 15ê Tebaxe ameyoxê kurdan û şaran roşnî kerd.''

Qiseykerdişan ra dima hunermendan deyîrî vatî û şayîye pê govendan qedîyaye.