Bi hezaran roniştoxanê Eyn Îsayî û koçberanê Girê Sipî bi çalakîyêke hêriş û gefê dewleta tirke ya îşxalkere yê vera Rojawanî şermezar kerdî.

Çalakîye de pankartî, fotografê şehîdan û Rayberê Şarê Kurdî Abdullah Ocalanî û alayê QSDyî ameyî akerdene.

Çalakîye ra dima nameyê Keyeyanê Şehîdan ser o Eyşe Efendî qisey kerd û bêvengîya Rûsya û rejîmê Şamî ya vera hêrişan şermezar kerde.

Vervatoxê Komîteya Kulturî ya Kantonê Girê Sipî Fewaz El-Elîyî zî ard ziwan ke ê do komplo û plananê dişmenî do bin bifînê.

Çalakîye pê sloganan û selamkerdişê xoverdayîşê QSDyî qedîyaye.