Forumê Efrîn de Vurayîşo Demografîk û Qirkerdişo Etnîkî yo Mîyanneteweyî ke Qamişlo de ame viraştene qedîya.

Roniştişê peyênî yê Konferansî de tarîxnas û ekspertê asayîşê mîyanneteweyî Stanislav Ivanovî bale ante hêrişanê dewleta Tirkî yê serê hêzanê Kurdan ê ke Rojakewtena mîyanêne de bi qehremanî hemverê grûbanê teroran ê mîyanneteweyîyan xover danê. Raporo ke hetê Ivanovî ra şirawîya bi forumî hetê endamê NRLSyî Cîhan Xelîlî ra wanîya.

Îvanovî raporê xo de nê ardî ziwan: “Her çende mabênê Amûdê û Moskova de bi hezaran kîlometreyan estbê zî sey zafê Rûsyayijan ez zî bi heme zerrîya xo şima dir a. Ez heyranê şerwananê Kurdan a ke hemverê DAÎŞî de bi qehremanî şer kenê. Erdoganî senî îxanet ro grûbanê cîhadîstan kerd, bi paştîdayîşê hukmatanê Sûrîye û Iraqî ro şarê xo zî wina îxanet kerd. Hemverê Kurdan de paştî da DAÎŞî. La tenya bi nê qîmê xo nêard, bi tank û topanê xo kewte Efrîn, ûca îşxal kerd. Çi heyf o ke sûcê şerî yê Tirkîye hetê otorîteyanê Neteweyê Yewbîyayeyî ra nêame şermezarkerdene.

 Ez umîd kena ke do no forum bala rayapêroyîye bianco serê Efrînî û meseleyê Kurdan ser. Rûsya paştî dana ke Kurdî heme dîyaloganê Sûrîye de ca bigîrê. Ez bawer kena ke serfirazbîyayîşê Têgêrayîşê Neteweyî yê Kurdistanî ancax bi yewîya heme partîyanê Kurdan ê sîyasîyan bica bêro. Hukmatê ke Kurdistanî ser o kolonyalîzmî bica anê polîtîkaya ‘perçe bike û îdare bike’ danê dewamkerdene. Kurdî do sey şaranê bînan ê Rojakewtena mîyanêne biresê azadîya xo. Çîyo muhîm o yo ke îradeyo xoser û heqî bêrê garantîkerdene.

Ez waştişanê xo yê rindan seba heme beşdaranê forumî û şarê Kurdî şirawena.”

Neticeyê konferansî de fikro hempar o ke vejîya meydan hemverê vurnayîşê demografîkî û qirkerdişê etnîkîyî de ganî tedbîrî bêrê girewtene bi. Konferans de dîya zanayene ke dewleta Tirkî ya îşxalkare û çeteyanê ci Efrîn îşxal kerdo. Dimayê îşxalî ra zî hêrişê xo yê hemverê şarê ûcayî domnayê, koçberî serê înan de ferz kerda, malê înan talan kerdo, nameyê cayan vurnayê kerdê Tirkî û perwerdeyê bi Tirkî ameyo ferzkerdene.

Beyanname de nê zî ameyî vatene: “Ma sey Merkezê Stratejîk ê Rojavayî seba hayîdarkerdişê rayapêroyîye û cimatê mîyanneteweyî waşt ke bidê zanayene Efrîn de vurnayîşêko deografîk yeno kerdene, qirkerdişêko etnîkî esto û ma no forum organîze kerd.”  

Forum bi beşdarîya 150 ra vêşêr akademîsyen, sîyasetkar û huqûqnasanê camîaya mîyanneteweyîye ra û bi beşdarîya telekonferansan ê nuqteyanê cîyayan ê dinya ra ame viraştene.

Netîceyê ercnayîşanê hîrayan ê forumî de nê çend pêşnîyaran rê ca dîya: Heta îşxalkarî Efrîn ra bêrê vetene merkezanê muhîman ê cayanê mîyanneteweyî û herêmkîye de forum û kongreyî bêrê viraştene. Komîteyêk ke bicaardişê qeraranê forumî teqîb bikero bêro viraştene. Merkezêk ke bicaardişanê dewleta Tirkî yê Efrînî îspat bikero bêro akerdene. Seba agêrayîşê Efrînijan bi şaristanê xo xebatî bêrê kerdene û kesê ke Efrîn ra barê Şehba kerdê, înan rê paştî bêro dayene û seba paştîdayîşî organîzasyonanê heqanê merdiman ê mîyanneteweyîyan rê vengdayîşî bêrê kerdene.