Ewro Roşanê Ziwanê Kurdkî yo. Hemserekê Zanîngehê Kobanê Şervan Mislimî bi wesîleya Roşanê Ziwanê Kurdkî yê 15ê Gulane ANFyî rê qisey kerd.

Mislimî da zanayene ke şarê kurdî seba pawitişê ziwanê kurdkî zaf bedelî û şehîdî dayî. Mislîmî vat: ''Sîyasetê asîmîlasyonî yê dişmenî ra kurdî nêeşkayî bi ziwanê xo perwerde bivînê. Dişmenê kurdan tim vera nasnameyê kurdayetîye şer kerdo û xîret kerd ke kurdî ziwanê xo vîr a bikerê. Vakur de tirkî, Başûr û Rojawan de erebkî û Rojhelatê Kurdîstanî de zî farskî kurdan rê ameye ferzkerdene. Têkoşeranê ziwanê kurdkî zî tim xîret kerd ke kurdkî aver berê, bipawê û bimusnê domanan. Rixmê hende teda, hêriş, qedexe û zorbazîye zî kurdkî ameye pawitene û resaye nê rojan.''

Mislimî pare kerd ke Şorişê Rojawanî heman wextî de şorişê kurdkî yo û vat: ''Şorişê Rojawanî ra dima dibistana yewine yanî Dibistana Mamoste Osman Dadelîyî abîye. Di odayan de perwerdeyê kurdkî dest pêkerd. la ewro bi seyan dibistanî û bi hezaran mamosta û wendekarî est ê. Bêguman no bingeyê xo mîrasê têkoşînê Rayber Apoyî ra gêno. Şorişê Rojawanî de teyna domanê kurdî ney pêro domanî bi ziwanê xo perwerde vînenê. Zanîngehê Kobanê û Rojava de perwerdeyê bi kurdkî dîyeno. La xora nê seba kurdkî qîm nêkenê. Ganî ma seba ziwanê xo hîna zaf têkoşîn bikerê.

Ganî ma ziwanê xo ser o hîna zaf cigêrayîş û xebatan bikerê. Ganî ma bi kurdkî qisey bikerê, biwanê, binusê û bifikirê. Ma hêvî kenê ke ziwanê kurdkî tim bêro averkerdene.''