Bi tewrbîyayîşê 500 delegeyanê Vakur û Rojakewtena Sûrîye, Têgêrayîşê Ciwanan ê Şorişgêrî bi slogana ‘Xover bidê û faşîzmî birijnê’ bajarê Qamişlo de 15’ê Nîsane de konferansê xo viraşt. Ciwanê ke tewrê konferansî bîyî, derheqê averşîyayîşê kombîyayîşî de û amacê ci de ANF’yî rê qisey kerd.

Beşdaranê konferansî ra endamê Komîteya Sporî ya Hesekê Alan Bêkesî vat ke înan konferans de xeylî komîteyî awan kerde û wazenê nê komîteyan zereyê dewan û bajaran de xurt bikerê.

Alan Bêkesî ard ziwan ke rojdemê înan o sereke ra yew zî destê îşxalkaran ra xelaskerdişê Efrînî yo û vat ciwanî do bi hawayêkê xurtî seba bicaameyîşê nê amacî bixebetîyê.

Alan Bêkesî bale ante serê esîrîya Rayberê Şarê Kurdî Abdullah Ocalanî û vat, xoverdayîşê înan ê seba azadîya Ocalanî do dewam bikero.

Îdarekaranê organîzasyonê ciwanan ê Hesekê ra Hêlîn Mistefa zî vat, ê do seba xoverdayîşê grevê vêşanîye yo ke hemverê tecrîdkerdişê Ocalanî bi serkêşîya Leyla Guvene dest pêkerdibi hurzê payan ser.

Endamê organîzasyonê ciwanan ê Dêra Zorî Ehmed Îsayî yo ke Ereban ra yo zî ard ziwan ke bi konferansî ciwananê Ereban xo newe ra organize kerdo û seba demê neweyî înan plansazîyêk amade kerda.

Ehmed Îsayî vat, “Seba çîyo muhîm o yo ke xo bivurnê. Çunke ciwanê ma heta nika mîyanê şerê taybetî de ameyê asîmîlekerdene. Naye ra gureyê ma o yo ke ma azêkê neweyî biafernê.”

Endama Komîteya Sporî ya Dêra Zorî Xewla Selmo ke a zî Ereb a vat ke dimayo ke Dêra Zor çeteyanê DAÎŞ'î ra ame xelesnayene, ê do seba ke mezgê DAÎŞ'î bi temamî herêma înan ra wedarîyo fikir û felsefeya Rayberê Şarê Kurdî Abdullah Ocalanî zereyê dewan û bajaran de bikerê vila.

Endamê organîzasyonê ciwanan ê Şeddadî Yamin El Hiloyî zî vat ê do goreyê ruhê demî xo organize bikerê û şorişî rê bibê cewab.