Merkezê Çapemenî yê QSD'yî bîlançoyê şerê saetanê şewe yê Baxozî eşkera kerd. Eşkerayîye de ame vatene  şero ke qewimîyayo de 24 çeteyî ameyî kiştene, cenazeyê 7 çeteyan kewtî destê şerwananê QSD’yî.

QSD’yî nê zanayîşî dayî:

“Şerwananê ma hêrişê mewzîyanê çeteyanê DAÎŞ`î yê zereyê Baxozî kerd, netîceyê nê hêrişî de şer qewimîya. Bi averşîyayîşê şerwanan xeylê terorîstî ameyî kiştene.

Sewbîna mewzî de zî mabênê QSD’yî û çeteyanê DAÎŞ’î de şer vejîya. Xeylê çeteyê DAÎŞ’î ameyî kiştene û şerwanê ma derbazê 20 nuqtayan bîyî.

Saetanê şanî de şerwanan têgêrayîşê çeteyan zereyê tunelêk de ferq kerd, seba ke tunel kerd hedef xeylê çeteyî ameyî kiştene. Hetê bînî ra çeteyêk nêzdîyê nuqtaya hêzanê ma de xo teqna û netîceyê nê serebûtî de şerwanêkê ma bi birîndar. Rexmê naye zî hêzê ma derbazê 16 nuqtayan bîyî.

Terorîstan buldozerêkê hêzanê ma bi di çeteyanê xokiştoxan kerd hedef, buldozer bi temamî veşa, zerarêk nêreşto şerwananê ma. Nê hêrişî ra dima şerêko derg dest pêkerd û netîceyê şerî de xeylî çeteyî ameyî kiştene û cenazeyê 7 çeteyan kewtî destê şerwananê ma. Hetê bînî ra zî teyaranê Koalîsyonî nuqtayê terorîstan û wareyê kombîyayîşê înan kerdî hedef.

Mewzîyanê Baxozî de, demo ke na eşkerayîye ameye dayene zî têkewtişan hêdî hêdî dewam kerdêne.

Netîceyê peyênî wina yê:

Hûmara terorîstanê ke ameyî kiştene: 24 terorîstî (cenazeyê 7 çeteyan destê şerwanan de yê).

Hûmara terorîstanê ke xo kişto: 3 terorîstî.

Hûmara şervananê birîndaran: 1 şerwan.”