Vervatoxê Rêxistina Heqanê Merdiman a Efrînî Îbrahîm Şêxoyî da zanayene ke  10 rojanê peyênan de 11ê ci cinîyî bi temamî 28 kesî hetê cerganê dewleta tirke ra ameyî remnayene.

Nameyê tay kesanê ke ameyî remnayene wina yê: Gulê Nûrî Reşîd, Mewlûde Mihemed Cabo, Helîme Mûsa, Culye Asya û Mihemed Caro, Ayşe Hiso Hemîd, Ferîde Mihemed Hisên, Emîne Hemîd Henan, Şefîqe Mihemed.

Goreyê rêxistine cerganê koma El-Hemzatî cinîya bi nameyê Ayşe Mihemed zî kişte.

Goreyê çimeyanê herêmîyan dewa Anqelê ya qezaya Şîyê ya Efrînî de zî 2 sivîlê bi nameyê Hisên Êlîko (32) û Delîl Reşîd Êlîko (28) hetê cerganê dewleta tirke ra ameyî remnayene.

30ê teşrîna peyêne ra verî zî polîsanê leşkerîyan ê îstîxbaratê tirkî sivîlê bi nameyê Xelîl Mihemed Şeban (60), Rifet Hisên Mihemed (43) û Omer Beyrem Elo (65)  remnabî. Şeban bi fîdye vera dîya la aqîbetê Rifet û Omerî nêzanîyeno.