Meclîsê Sûrîyeya Demokratîke (MSD) bi wesîleya serrgêra  6. ya hêrişanê îşxalî yê dewleta tirke û çeteyanê ci yê vera Efrînî eşkerayîya nuştekîye daye.

MSDyî xoverdayîşê biheybetî yê 58 rona ê şarê Efrînî yê vera hêrişê îşxalê dewleta tirke vist vîrî û bale ante hêrişanê qirkerdişî yê artêşa tirke yê vera herême ser û vat: ''Dewleta tirke 6 serrî yo pîya bi çeteyanê xo Efrîn de sûcê merdimîye kena. Dewleta îşxalkere nika zî hêrişê  binawî û waranê sîvîlan kena. Hêrişê gadarî reyna rîyê dewleta tirke ya îşxalkere yê hêrişkar gonîwerî  ramojnena.''

Eşkerayîye de veng dîya Yewîya Ewropa,Yewîya Ereban, dezgehanê eleqedaranê Ewropa û komelê mîyanneteweyî û ke wa vera hêrişanê îşxalî yê dewleta tirke bêveng memanê, şirê Tirkîya ser  ke verê îşxalkî bêro girewtene û sûcdarî mehkemeyanê mîyanneteweyî de bêrê muhakemekerdene.

MSDyî veng da sûrîyeyîjan, partîyanê sîyasîyan dezgehan û vat,  ''Tay babetan de fîkrê ma  cîya bê zî vera hêrişanê îşxalî yê dewleta tirke ganî ma  bibê yew û bi rûhê berpirsîyarîya netweyî têbigêrê. Ma pêkewtişanê zereyî caverdê, vera polîtîkayanê qirkerdişî yê vera şarê Sûrîye bibê yew. Eke ma yewîya xo xurt mekerê û pîya têmegêrê ma nêeşkenê ser bikewê.''