Zanîngehê Kobanê û Rojawanî de ke termînê qeydê serra 2019-2020 dest pêkerd, muracatî zêde yê. Seba zanîngehê ke exlebî bi 22 beşan destpê serra perwerdeyî û banderîye bike qeydkerdişê înan do heta 5'ê Teşrîna verêne dewam bikê.
Seba zanîngehanê Rojawan û Kobanê yê Vakur û Sûrîye de termînê qeydê serra newî ya perwerde û banderîye dest pêkerd. Karê qeydkerdişî do heta 5'ê Teşrîna Verêne dewam bikê û maracatê emserî goreyê serreyanê bînan zêdêr ê.
Serranê vîryarteyan de rixmê şert û mercanê şer û tehdîtanê herême zî Vakur û Rojakewtena Sûrîye de perwerde nêameye vindertene û perwerdehî de serkewtişê pîlî ameyî destkewtene. Dimayê şorişê 19'ê Temmuza 2012 pê asta dibistana awile, mîyanîn û lîse perwerdehîye bêmabên pê 3 ziwanan dewam kerd. Rojawan de ke naye ra verî zanîngeh çinebi, serra 2015 de Zanîngehê Efrînî, 2016 de ê Rojawan û 2017 de Zanîngehê Kobanê ame sazkerdene.
Têkilî temrînê qeydanê zanîngehî Hemsereka Beşê Zanistê Fenî yê Zanîngehê Kobanê Sakîne Elî ANF'î ra vat, qeydê newî mabênê 10'ê Êlule û 5'ê Teşrîna Verêne de do dewam bikê. Sakîne Elî îfade kerd ke di zanîngehî zî emser pê sîstemê qeydo merkezî wendekaran qebul kenî. Zanîngehê Kobanê de beşê Ziwan û Edebîyatê Kurdkî, Laboratuwarê Tibbî, Matematîk, Fizîk, Kimya û Bîyolojîyî estê. Zanîngehê Rojawan de zî nê beşî estê: Matematîk, Fizîk, Kimya, Tarîx, Cografya, Mamostatî, Hunerê Weşî, Jineolojî, Edebîyat, Muhendisîya Petrolî, Muhendisîya Petro-Kimya, Muhendisîya Sazkerdişê Ekolojîk, Mekanîk, Açarnayîşê Îngilîzkî û Muhendisîya Înşeatî.
