Berpirsîyarê Karê teberî yê PYDyî Salîh Muslîmî da zanayene ke Amerîka şertê ke hêverê eşkera kerdîbî hema yê şertî nêameyî caardene la ê leşkeranê xo peyser ancenî û no zî ramojneno ke no qerar pabesteyê îşxalê Tirkîye yê Vakurê Surîye yo.

Salîh Muslîmî  qerarê Amerîka yê Sûrîye ra ancîyayîşî ANFyî rê ercna.

Salîh Mulîmî bale ante ke qerarê ancîyayîşî yê Amerîka  goreyê şertan ê ke înan hêverê eşkera kerdîbî, nişka yo û yê şertî vistî vîrî: ‘‘Qedîyayîşê DAÎŞî, Sûrîye ra vejîyayîşê Îranî û Sûrîye de caardişê îstîqrarî. Înan tim nê madeyî vatêne la ewro rixmo ke nê şertan ra yew zî nêameyo caardene,  înan qerarê ancîyayîşî girewt.Coka ma vanê ke no qerar nişka ameyo girewtene.‘‘

Muslîmî vist vîrî ke înan ne veng dayo Amerîka  û ne zî înan ra vato şo û wina dewam kerd: ‘‘Xora ê semedê pawitişê ma nêameyî. Ma xo bi hêzê xo yê cewherî pawenê. Goreyê şertan ma pîya têgêrayî la ma qet yew wext paştê xo înan rê gire nêda. Raştameyîşê tehdîtê îşxalî yê Erdoganî û qerarê ancîyayîşê Amerîka ramojneno ke eşkera mebi zî pêkerdişêk esto.  Ma zî goreyê şertan, semedê hewlê şaranê xo her kesî dir kewenî dîyalogî û pêdîyayîşan virazenî.‘‘

Muslîmî bale ante ke tehdîtê Erdoganî yê vera Vakurê Sûrîye cidî yê û wina qedîna: ‘‘Erdogan timûtim vano ez hêrîş kena. Beno ke hêriş bikero. Ma çewî ra nêvanî ma bipawe. Ma estî, ma xo pawenê. Qerardarîya ma ya xopawitişî ya topyekûnî esta. Bawerîya ma şar û sîtemê pawitişî yê ma  ra esta‘‘