Berpirsîyarê Karê teberî yê Partîya Yewîya Demokratîke (PYD) Salîh Muslîmî derheqê tehdîdanê serekkomarê Tirkî Recep Tayyîp Erdoganî de ANFyî rê qisey kerd. Muslîmî bale ante pêvînayîşanê mabênê Tirkîye û Amerîka û vat ke “ma nêzanê binê masa de çi têgêreno.”

Muslîmî vat ke Erdoganî MHP, Ergenekon, Hîzbullah û sûcdaranê serranê 90an dir îtîfaq viraşto û wina vat: “Goreyê vînayîşê ma no newekerdişê zihnîyetê Îttîhat û Terakkî yo. Bi nê îtîfaqê neweyî na rey wazenê Kurdan raşte ra wedarê.”    

'ERDOGAN SEBA HEME ŞARAN TEHLUKEYÊKO PÎL O'

Muslîmî vat ke vernîya Kurdan de tehlukeyêko pîl esto û nê bestî pa: “No zihnîyetê Îttîhat û Terakkî bi mentiqê ‘Kurdo tewr rind Kurdo merde yo’ nizd beno. Serê Kurdan de tehdîdêko pîl esto la no bi Kurdan bisînor nêyo. Mesela ê kewtî Îdlîb û şarê Erebî rê zî zulm kerd. Wazenê Heleb ra heta Mosil ûca ra heta Kerkuk bigîrê, no Mîsaqo Milî yo newe yo. No qirkerdiş tenya do bi Kurdan bisînor nêmano, dore do bêro şaranê bînan zî.”

'MA XO SEPERNENÊ ŞARÊ XO'

Muslîmî dewamê qiseykerdişê xo de vat ke Tirkîye rolo ke seba newe ra dîzaynkerdişê Rojakewtena mîyanêne dîyayo ci bica nêana û bi goreyê planê xo  rayra şina û nê vatî: “Seba bicaardişê nê planê xo hemeyê terorîstan şuxulnayî. DAÎŞ şuxulna, El Nusra şuxulna. Kurdan hemverê DAÎŞî de şer kerd û wareyê mîyanneteweyîyî de bî aktîf. Tirkîye amî nuqteya ke ‘wa Kurdî nêbê wayîrê çîyêk kam çi wazeno ez do bidî ci.’ Bewlî bi ke tenya qismêkê Kurdan nê tu Kurdêk qebûl nêkena û wazena ke hemine ra bixelesîyo. Şarê ke herême de yê bê hêzê xo yê cewherîyî xo nêsepernenê yewna hêzî. Bombayê ke Efrîn de ma ser o varayêne yê NATO bî. Tirkîye ge kîşta NATOyî de ge kîşta Rûsya de sîyasetêkê pragmatîkî rayra bena. La ma hêzê şarê xo ra bawer kenê.”   

'AMERÎKA NE WAZENA MA NE ZÎ TIRKÎYE VÎNDÎ BIKERO'

Muslîmî peynîya qiseykerdişê xo de wina vat: “Amerîka hetêk ra nêwazena Kurdan ca verdo hetêna ra zî destê aye Tirkîye ra zî nêbeno. Tirkîye endamê NATOyî ya û Amerîka dir a. Ma rê çîyo muhîm nêyo ke wa têkilîyê mabênê Amerîka û Tirkîye têkilîyê ke zirar danê ma nêbê. La Tirkîye tim vana 'ya ez ya ê.' Amerîka nêwazena ma vîndî bikero û nêwazena Tirkîye zî vîndî bikero. Tirkîye bi nê sîyasetê xo tenya seba Kurdan nê seba hemeyê Rojakewtena mîyanêne û seba hemeyê dinya tehluke ya.”