Parlamentera Euskal Herria Bildu (EH Bildu) ya Parlamenta Herêma Xosere ya Baskî Oihana Etxebarrieta paştgîranê Hemleya 'Rayber Apoyî rê Azadîye, Meseleya Kurdan rê Çareserîye' ra yew a. Oihana Etxebarrieta derheqê tecrîdê Îmraliyî û nîqaşanê serê meseleya kurdan de ANFyî rê qisey kerd.

Etxebarrieta ard zian ke tecrîdê vera Rayber Apoyî nîşaneya tedaya vera kurdan û sîyasetê kurdan a û vat: ''Abdullah Ocalan rixmê tedayan zî xîret keno ke meseleya kurdan çareser bikero. Tecrîd îşkenceyêko raştikên o û vera têgêrayîşê kurdan zî metodêkê teda yo. Pêvînayîşê Abdullah Ocalanî girîng o. Merdiman derheqê weşîya ey de xeberêke girewte. Ez hêvîdar a ke prosesêkê haştîye yo newe dest pêbikero. Abdullah Ocalan lîderêko sîyasî yo ke ganî bibo parçeyêkê prosesî.''

Parlamentera Etxebarrieta mesajê Rayber Apoyî ercna û vat: ''Mesajê ey zaf bitesîr o. Şert û mercê ke Abdullah Ocalan tede yê, îşkence yo. Mesajê Ocalanî kapasîteya ey a entelektuele eşkera kerde. O herinda ke teslîmê rovanşîzmî bibo, xîret keno ke seba şarê kurdî rayîrê dîyalogî, rayîrê sîyasetî biaferno. Na rewşe bitesîr a.''

Parlamenter Etxebarrieta îfade kerd  ke çareserîya meseleya kurdan Îmraliyî ra derbaz bena û vat: ''Seba çareserîye ganî Abdullah Ocalan azad bibo. O şarê kurdî temsîl keno û lîderêko winayên o ke eşkeno meseleyan çareser bikero. Ganî dewleta tirke goş bida qiseyanê ey ser. Ey felsefeya Jineolojî afernaye û 'Jin, Jiyan, Azadî' kerde felsefeya cinîyan. 'Jin, Jiyan, Azadî' sloganêkî ra zêdeyêr nîşaneya şorişêkî ya.''

Etxebarrieta da zanayene ke qedexeyê vera PKKyî verê çareserîya meseleya kurdan de astengî ya û ganî Yewîya Ewropa nê qedexeyî wedarna.

Parlamenter Etxebarrieta dîyar kerd ke seba çareserîya meseleya kurdan û azadîya Rayber Apoyî mesuldarîyêka pîle kewena milê komelê mîyanneteweyîyî û vat: ''Ma sey EH Bilduyî hertim hetê têgêrayîşê kurdan de yê û azadîya Ocalanî wazenê. Ganî Birêz Ocalan azad bibo. Çareserîya meseleya kurdan bi azadîya Birêz Ocalanî bena.''